الماتى وبلىسىندا «الاتاۋ» جەڭىلدىكتى يپوتەكالىق باعدارلاماسى بويىنشا وتىنىمدەر قابىلداۋ باستالدى. كەيبىر كاسىبي ساناتتاعى قازاقستاندىقتار جىلدىق 5% مولشەرلەمەمەن، باستاپقى جارناسى 10%-دان باستاپ تۇرعىن ءۇي قارىزىن الا الادى، دەپ حابارلايدى infohub.kz سايتى.
نەسيەنىڭ ماكسيمالدى سوماسى 30 ملن تەڭگەنى قۇرايدى. باعدارلامانىڭ اۋماقتىق شەكتەۋى بار – تەك قونايەۆ قالاسىنداعى جاڭا عيماراتتان پاتەر ساتىپ الۋعا بولادى. 2026 جىلى باعدارلاماعا 3،2 ملرد تەڭگە ءبولىندى. بۇل قاراجات 120-دان استام تۇرعىن ءۇي قارىزىن بەرۋگە جۇمسالماق.
5% يپوتەكانى كىم الا الادى
باعدارلاما ءبىلىم، دەنساۋلىق ساقتاۋ، مادەنيەت، سپورت، الەۋمەتتىك سالا، ەنەرگەتيكا جانە كوممۋنالدىق شارۋاشىلىق قىزمەتكەرلەرىنە قولجەتىمدى. مەملەكەتتىك قىزمەتشىلەر دە قاتىسا الادى.
2026 جىلى الەۋەتتى قارىز الۋشىلار ءتىزىمى كەڭەيتىلدى – العاش رەت بۇقارالىق اقپارات قۇرالدارىنىڭ قىزمەتكەرلەرى قوسىلدى.
ۇمىتكەر قازاقستان ازاماتى بولۋى كەرەك، جاسى 18-دەن 60-قا دەيىن. تاعى ءبىر مىندەتتى شارت – سوڭعى 24 اي ىشىندە مەنشىكتى تۇرعىلىقتى جەرىنىڭ بولماۋى. سونىمەن قاتار، كەمىندە ەكى جىل رەسمي جۇمىس ورنى جانە زەينەتاقى جارنالارى قاجەت.
قاتىسۋشىلار بالل بويىنشا ىرىكتەلەدى
رەسمي تالاپتارعا سايكەستىك جەڭىلدىكتى يپوتەكا الۋعا كەپىلدىك بەرمەيدى. الدىمەن قۇجاتتاردى اكىمدىك تەكسەرەدى، سودان كەيىن وتىنىمدەردى وبلىستىق كوميسسيا قارايدى. باعدارلاماعا قاتىسۋشىلار باللدىق جۇيە نەگىزىندە انىقتالادى.
مىسالى، رەسمي نەكە ءۇشىن ەكى بالل بەرىلەدى. كامەلەتكە تولماعان بالالاردىڭ بولۋى ءۇشىن دە سونشا بالل، ال ءاربىر كەلەسى بالا ءۇشىن تاعى ءبىر بالل قوسىلادى.
ەكى جىلدان استام ەڭبەك ءوتىلى ءۇشىن ەكى بالل، ال ءاربىر قوسىمشا جىل ءۇشىن تاعى ءبىر بالل بەرىلەدى. مەملەكەتتىك قىزمەتتە نەمەسە بيۋدجەتتىك سالادا جۇمىس ىستەۋ بەس بالل بەرەدى. اتالعان بالداردىڭ ەڭ كوبى – جەتى – الەم چەمپيوندارى نەمەسە ازيا ويىندارىنىڭ جەڭىمپازدارى، ونىڭ ىشىندە پاراليمپياداشىلار ءۇشىن قاراستىرىلعان.
جەڭىمپازدار «وتباسى بانككە» جولداما الادى. بانك قارىز الۋشىنىڭ تولەم قابىلەتتىلىگىن، ونىڭ كىرىستەرى مەن نەسيە تاريحىن باعالايدى. ەگەر مەنشىكتى كىرىس يپوتەكا راسىمدەۋ ءۇشىن جەتكىلىكسىز بولسا، شارتتار ەكى كەپىلگەرگە دەيىن تارتۋعا مۇمكىندىك بەرەدى.
وتىنىمدەر قونايەۆ قالاسىنداعى «شاحنۋر» بيزنەس-ورتالىعىندا قابىلدانۋدا. دۇيسەنبىدەن جۇماعا دەيىن ساعات 9:00-دەن 18:00-گە دەيىن، ال سەنبىدە 13:00-گە دەيىن جۇگىنۋگە بولادى. وتىنىمدەردى قابىلداۋ قاشان اياقتالاتىنى ازىرگە حابارلانعان جوق.