الەۋمەتتىك جەلىلەردە الماتى وبلىسىندا شەتەلدىك ازاماتشا پوليسيا قىزمەتكەرلەرى تاراپىنان زورلىق-زومبىلىققا ۇشىرادى دەپ ارىزدانعانى تۋرالى اقپارات تارادى. جاعدايدى وبلىستىق پوليسيا دەپارتامەنتى ءتۇسىندىردى، دەپ حابارلايدى infohub.kz سايتى.
Threads الەۋمەتتىك جەلىسىندەگى abv_novosti پابليگى الماتى وبلىسىندا زورلىققا ۇشىراعانىن مالىمدەگەن شەتەلدىك ازاماتشا تۋرالى جازبا جاريالادى. «قوناەۆتا 28 جاستاعى شەتەلدىك ايەل جەرگىلىكتى پوليسيا قىزمەتكەرلەرى ونى توپتاسىپ زورلادى دەپ ارىزداندى. قىزدىڭ ايتۋىنشا، ونىڭ ارىزىن ورگانداردا ايت قىزىپ جازدىرعان، كەيىن پوليسەيلەر ونىڭ پاتەرىن باقىلاپ، زاتتاي دالەلدەمەلەردى الۋ ءۇشىن تەرەزەنىڭ تورىن شەشىپ العان. قورقىنىشتان ۇيدەن شىعۋعا قورقادى، دارىگەرلىك كومەككە مۇقتاج بولسا دا، ۇيىنە جەدەل جاردەم مەن پاترۋلدىك كولىك كەلگەن»، — دەلىنگەن حابارلامادا.
جازباعا تىركەلگەن بەينەجازبادا قىز وزىندە زاتتاي دالەلدەمە — بولجامدى زورلاۋشىنىڭ بيوماتەريالى قالعان ءىش كيىم بار ەكەنىن ايتادى.
جاريالانىمعا الماتى وبلىسى پوليسيا دەپارتامەنتى جاۋاپ بەردى. «وسى فاكتى بويىنشا پوليسيا قىزمەتكەرلەرى قىلمىستىق ءىس قوزعادى. كۇدىكتىلەر ۋاقىتشا ۇستاۋ يزولياتورىنا قامالدى. ايەلدىڭ ارىزى بويىنشا وقيعا قونايەۆ قالاسىندا بولعان. العاشقى تەرگەۋ جانە جەدەل-ىزدەستىرۋ ءىس-شارالارى بارىسىندا ارىزدا كورسەتىلگەن ەكى ەر ادام انىقتالىپ، ۇستالىپ، جەتكىزىلدى. بولعان وقيعانىڭ بارلىق دايەكتەرى مەن ءمان-جايى مۇقيات تەكسەرىلىپ، ءتيىستى قۇقىقتىق باعاسىن الادى»، — دەدى پوليسيادا.
سونداي-اق قازىرگى تاڭدا قاجەتتى تەرگەۋ جانە جەدەل-ىزدەستىرۋ ءىس-شارالارى جۇرگىزىلىپ جاتقانى اتاپ ءوتىلدى. تەرگەۋ الماتى وبلىسى پد تەرگەۋ باسقارماسىنا تاپسىرىلدى. تەرگەۋ مۇددەسى ءۇشىن وزگە اقپارات جاريا ەتىلمەيدى.