الماتى وبلىسىندا ۇيدەن قاشىپ، قاراعاندىدا تۇرىپ جاتقان 17 جاستاعى قىزدىڭ اتا-اناسىنا قاتىستى شارا قولدانىلدى. ءجاسوسپىرىمنىڭ وزىنە دە شارا قولدانىلادى، دەپ حابارلايدى infohub.kz سايتى.
كتك تەلەارناسىنىڭ دەرەگىنشە، 17 جاستاعى قىزدىڭ جۋىرداعى قاشۋىنان كەيىن وتباسىنا قۇقىق قورعاۋشىلار، پوليسەيلەر، شەنەۋنىكتەر مەن پسيحولوگتان قۇرالعان ارنايى دەلەگاسيا باردى. ساپاردىڭ ماقساتى — بالانىڭ ۇيدەن كەتۋىنىڭ شىنايى سەبەپتەرىن انىقتاۋ بولدى.
اڭگىمە بارىسىندا ءجاسوسپىرىمنىڭ ءوزى بولەك جانە ءوز بەتىنشە تۇرعىسى كەلگەنىن ايتتى.
«ءبىز قىزدى دا، جالپى وتباسىن دا باقىلاۋعا الامىز: ۇنەمى مونيتورينگ جۇرگىزىپ وتىرامىز. كەڭەيتىلگەن، القالى تۇردە قاراستىرامىز، ال كوميسسيا دۇرىس دەپ تاپقان جاعدايدا عانا ونى كامەلەتكە تولماعانداردى بەيىمدەۋ ورتالىعىنا ورنالاستىرامىز»، — دەدى قاراساي اۋدانى اكىمىنىڭ ورىنباسارى ازامات جاندوسوۆ.
ارنايى كوميسسيانىڭ ساپارىنا قىزدىڭ اناسى ونشا قۋانعان جوق. ال جۋرناليستەرگە قىزىنىڭ بەتىن كورسەتۋگە تىيىم سالدى. وقيعادان كەيىن وتباسى ەسەپكە قويىلادى. ءقازىر بالا قۇقىقتارىن قورعاۋشىلار قىزدىڭ ءبىلىمىن جالعاستىرۋ ماسەلەسىن شەشىپ جاتىر.
«بالانىڭ جاعدايىنىڭ جاقسى ەكەنىنە ءوز كوزىمىزبەن كوز جەتكىزۋ ءۇشىن دەرەۋ كەلدىك. ەندى بۇكىل كوميسسيا بولىپ قىزدىڭ ماماندىعى بويىنشا ودان ءارى وقۋى ماسەلەسىن قاراستىرامىز. سونىمەن قاتار جاسوسپىرىممەن پسيحولوگتار جۇمىس ىستەيدى»، — دەپ اتاپ ءوتتى الماتى وبلىسىنىڭ بالا قۇقىقتارىن قورعاۋ باسقارماسىنىڭ باس مامانى ماديار شاراپوۆ.
ەسكە سالايىق، 17 جاستاعى قىز 21 شىلدەگە قاراعان ءتۇنى جوعالىپ كەتكەن. ول زاتتارىن جيناپ، جيناقتارىن الىپ، الماتى وبلىسىنداعى دولان اۋىلىنداعى ۇيىنەن شىعىپ كەتكەن. جۋىردا ءجاسوسپىرىمنىڭ تابىلعانى بەلگىلى بولدى. ول وسى ۋاقىت بويى قاراعاندىدا بولعان — جەكەمەنشىك بالاباقشادا كۇتۋشى بولىپ جۇمىس ىستەپ، پاتەر جالداپ تۇرعان.