بۇعان دەيىن قوناەۆتا توپتاسىپ زورلاۋ تۋرالى ارىزدانعان رەسەي فەدەراسياسىنىڭ ازاماتى بەينەۇندەۋ جازىپ، ونى Threads الەۋمەتتىك جەلىسىندە جاريالادى. قىز ءوز مالىمدەمەسىندە قىلمىسقا پوليسيا قىزمەتكەرلەرىنىڭ قاتىسى بار دەگەن بۇرىنعى سوزدەرىن جوققا شىعاردى، دەپ حابارلايدى infohub.kz سايتى.
شەتەلدىكتىڭ ايتۋىنشا، ول بۇرىن تاراتقان شابۋىلدى ءتارتىپ ساقشىلارى جاسادى دەگەن اقپارات شىندىققا سايكەس كەلمەيدى.
«ماعان قورقىنىشتى قىلمىس جاسالدى، وزدەرىن پوليسيا قىزمەتكەرىمىز دەپ تانىستىرعان ەكى ەر ادام مەنى زورلادى. مەن اداستىرىلدىم. تەرگەۋ ولاردىڭ بىرەۋى بۇرىن سوتتالعان ادام بولىپ شىققانىن انىقتادى... بۇگىندە ماعان جاماندىق جاساعان ادامدار ۇستالدى. پوليسيانىڭ الدىندا كەشىرىم سۇرايمىن، ماعان دۇرىس ەمەس اقپارات بەرىلگەن ەكەن»، — دەدى ول.
قىز پوليسيانىڭ وبەكتيۆتى تەرگەۋ جۇرگىزىپ جاتقانىن، ال ونىڭ قۇقىعىن ادۆوكات قورعاپ جۇرگەنىن قوستى.
ەسكە سالايىق، بۇعان دەيىن 28 جاستاعى شەتەلدىك ايەل قوناەۆتا جەرگىلىكتى پوليسيا قىزمەتكەرلەرى توپتاسىپ زورلادى دەپ مالىمدەگەن بولاتىن. الماتى وبلىسى پوليسيا دەپارتامەنتى بۇل دەرەك بويىنشا قىلمىستىق ءىس قوزعالىپ، ەكى كۇدىكتى ۇستالعانىن حابارلادى. كەيىن ۆەدومستۆو ۇستالعاندار پوليسيا قىزمەتكەرلەرى ەمەس ەكەنىن قوستى.