الماتى وبلىسىندا سوت نەگىزسىز بايىتۋ ءىسى بويىنشا بىتىمگەرشىلىك كەلىسىمدى بەكىتتى — جاۋاپكەر ايىنا 100 مىڭ تەڭگە تولەۋگە كەلىستى، دەپ حابارلايدى infohub.kz.
بالقاش اۋداندىق سوتى نەگىزسىز بايىتۋدى ءوندىرىپ الۋ تۋرالى تالاپ قويۋدى قارادى. انىقتالعانداي، 2026 جىلعى 21-23 قاڭتار ارالىعىندا بەلگىسىز ادامدار مەملەكەتتىك ورگاندار مەن بانك قىزمەتكەرلەرى بولىپ تانىستىرىپ، الداۋ جولىمەن تالاپكەردىڭ بانكتىك شوتتارىنان اقشاسىن يەمدەنگەن. ولار سەنىمدى تەرىس پايدالانىپ، اقپاراتتىق جۇيەلەردى قولدانا وتىرىپ، ونىڭ شوتتارى مەن بانك تەرمينالدارىنان اقشانى ءارتۇرلى ادامدارعا، سونىڭ ىشىندە جاۋاپكەرگە اۋدارعان.
سۋديا-مەدياتوردىڭ كومەگىمەن تاراپتار مەدياسيا ارقىلى داۋدى رەتتەدى. تاراپتار اقپاراتتىڭ تولىقتىعى مەن دۇرىستىعىن راستاپ، مەدياسيا تارتىبىندە داۋدى رەتتەۋ تۋرالى كەلىسىمگە قول قويدى.
كەلىسىم شارتتارى بويىنشا جاۋاپكەر تالاپكەرگە 3،8 ملن تەڭگە، ونىڭ ىشىندە نەگىزسىز بايىتۋ ءۇشىن 3،5 ملن تەڭگە جانە سوت شىعىندارى ءۇشىن 300 مىڭ تەڭگە تولەۋگە مىندەتتەندى. تولەم ايىنا 100 مىڭ تەڭگەدەن قولما-قول اقشامەن ءار ايدىڭ 15ء-ى كۇنىنە دەيىن، 2026 جىلعى 15 ماۋسىمنان باستاپ 2029 جىلعى 15 شىلدەگە دەيىن 38 اي بويى جۇرگىزىلەدى.
ەگەر كەلىسىم بەلگىلەنگەن مەرزىمدە ورىندالماسا، اتقارۋ پاراعى تالاپكەردىڭ ءوتىنىشى بويىنشا ماجبۇرلەپ ورىندالۋعا جاتادى. ءىس بويىنشا ءىس جۇرگىزۋ توقتاتىلدى. تولەنگەن مەملەكەتتىك باج سالىعى 34 980 تەڭگە كولەمىندە تالاپكەرگە قايتارىلدى. ۇيعارىم زاڭدى كۇشىنە ەندى.