الماتى وبلىسىندا سۋداعى Formula-1 H2O پيلوتتارىنىڭ اكادەمياسى مەن سپورتتىق كاتەرلەر شىعاراتىن زاۋىت اشۋ جوسپارلانۋدا. الداعى بەس جىلدا قاپشاعاي سۋ قويماسىندا حالىقارالىق Formula-1 H2O چەمپيوناتىنىڭ كەزەڭدەرى وتەدى، دەپ حابارلايدى infohub.kz سايتى.
الماتى وبلىسى اكىمدىگىنىڭ مالىمەتىنشە، قونايەۆ قالاسىندا سپورتتىق سۋ تەحنيكاسىنىڭ پيلوتتارىن دايىندايتىن اكادەميا اشۋ كوزدەلۋدە. سونداي-اق، وندا وسىنداي جارىستارعا ارنالعان كاتەرلەر شىعاراتىن زاۋىت سالىنادى.
«ءبىز حالىقارالىق چەمپيوناتتىڭ ورتالىق ازيادا كەڭىنەن دامۋىن قالايمىز. سوندىقتان الەمدەگى ەڭ ءىرى سۋ جارىستارىن سۋ ءتۋريزمى سالاسىنداعى الەۋەتى كەڭىنەن تانىمال قونايەۆ قالاسىندا وتكىزۋ تۋرالى شەشىم قابىلدادىق»، — دەدى H2O Racing كومپانياسىنىڭ وكىلى رايموندو دي سان دجەرمانو.
اكىمدىكتە چەمپيوناتتىڭ وتكىزىلۋى ايماققا تۋريستەردى تارتادى دەپ ەسەپتەيدى. تاياۋ بولاشاقتا الەمدىك جارىستاردا ەل نامىسىن قورعايتىن قازاقستان قۇراماسى قۇرىلادى.
اكادەميانىڭ قانشا پيلوت قابىلداي الاتىنى، قۇرىلىسى قاشان باستالاتىنى جانە بولاشاق كەشەننىڭ قانداي بولاتىنى تۋرالى اكىمدىك ازىرگە حابارلاعان جوق. ازىرگە بۇل — تەك جوسپار.
ەسكە سالايىق، بيىل Formula-1 H2O كەزەڭى قىرعىزستانداعى ىستىقكول كولىندە ءوتتى. جارىس كەزىندە ۇيىمداستىرۋشىلار 2027 جىلعى الەم چەمپيوناتى قاپشاعاي سۋ قويماسىندا وتەتىنىن رەسمي تۇردە مالىمدەدى.
بۇعان دەيىن Kursiv LifeStyle Netflix «فورمۋلا-1» جارىستارىن تىكەلەي ەفيردە كورسەتە باستاعانىن جازعان ەدى.