الماتى وبلىسىندا جەكە ءۇيدىڭ اۋلاسىنا كولىك سوعىلىپ، وندا وتباسى تۋعان كۇندى تويلاپ جاتقان. مەرەيگەر ايەل اياعىنان ايىرىلدى، دەپ حابارلايدى infohub.kz.
تۋىستارىنىڭ ايتۋىنشا، ولار داستارقان باسىندا وتىرىپ، 40 جاسقا تولۋ مەرەكەسىن تويلاپ جاتقان. كەنەتتەن جوعارى جىلدامدىقپەن كەلە جاتقان كولىك قاقپانى سوعىپ، تىكە اۋلاعا كىرىپ كەتكەن. سوققىدان جينالعاندار ءار جاققا ۇشىپ كەتكەن. ەڭ اۋىر جاراقاتتى تۋعان كۇن يەسى ايەل العان. ول قان جوسا بولىپ، اياعى بىت-شىت بولعان.
«ول قاتتى قان جوعالتتى، ەسىن جيا الماي ۇزاق جاتتى. ءبىر تاۋلىكتەن استام ەسىن جيعان جوق. كولىكتى كۋالىگى جوق قىز جۇرگىزگەن. ونىڭ قاسىندا كامەلەتكە تولماعان 14 جاسار ۇل بالا وتىرعان دەيدى. كولىك يەسى تۋرالى بىرەۋلەر ارتقى ورىندا وتىردى دەسە، ەندى بىرەۋلەر ونىڭ جوق ەكەنىن ايتادى»، — دەدى جابىرلەنۋشىنىڭ قارىنداسى.
مەرەيگەردى اۋىر جاعدايدا جەتكىزگەن. دارىگەرلەر سول اياقتى امپۋتاسيالاۋ تۋرالى شەشىم قابىلدادى. «ناۋقاستىڭ جاراقاتى بالتىردىڭ جوعارعى ۇشتەن ءبىر بولىگى دەڭگەيىندە بولدى. تىندەردىڭ تىرشىلىككە قابىلەتى جوقتىڭ قاسى، قان تامىرلارى، نەرۆتەر، بۇلشىقەتتەر جانە سۇيەك تىندەرى زاقىمدانعان. قازىرگى ۋاقىتتا پاسيەنتتىڭ جاعدايى سالىستىرمالى تۇردە قاناعاتتانارلىق، قاجەتتى ەم جۇرگىزىلۋدە»، — دەدى الماتى قالالىق №7 كلينيكالىق اۋرۋحانانىڭ پوليتراۆما ءبولىمىنىڭ مەڭگەرۋشىسى رامازان اسكەروۆ.
جابىرلەنۋشىنىڭ قارىنداسى دا جاراقات الدى — ونىڭ التى قابىرعاسى سىنعان.
كۇدىكتى ايەل وقيعا بولعان سوڭ بىردەن ۇستالعانى حابارلاندى. ءقازىر پوليسيا بارلىق ءمان-جايدى انىقتاپ جاتىر. «الدىن الا انىقتالعانداي، 24 جاستاعى ايەل كولىك جۇرگىزۋ كەزىندە باسقارۋدى جوعالتىپ، ەكى جاياۋ جۇرگىنشىنى قاعىپ كەتكەن. كۇدىكتى ۋاقىتشا ۇستاۋ يزولياتورىنا قامالدى. وسى فاكتى بويىنشا قاراساي اۋدانى پوليسيا باسقارماسى سوتقا دەيىنگى تەرگەۋ جۇرگىزىپ جاتىر»، — دەدى الماتى وبلىسى قاراساي اۋدانى پوليسيا باسقارماسىنىڭ باستىعى نۇسقابەك زاۋلانبايەۆ.
تۋىستارىنىڭ ايتۋىنشا، ايەل ءبىر جىلدان استام ۋاقىت بويى ەكو پروسەدۋراسىنا دايىندالىپ، انا بولۋدى ارمانداعان. ەندى بۇل جوسپارلاردى كەيىنگە قالدىرۋعا تۋرا كەلەدى. جاقىندارى ءادىل تەرگەۋدى تالاپ ەتەدى.