الماتى وبلىسىندا جىلدىق 5% مولشەرلەمەمەن «الاتاۋ» جەڭىلدىكتى يپوتەكالىق باعدارلاماسى ىسكە قوسىلدى. وعان 18 بەن 60 جاس ارالىعىنداعى جۇمىس ىستەيتىن قازاقستاندىقتار قاتىسا الادى، دەپ حابارلايدى infohub.kz سايتى.
«الاتاۋ» باعدارلاماسى تۇرعىن ءۇي جاعدايىن جاقسارتۋعا مۇقتاج وبلىس تۇرعىندارىنا ارنالعان. بيىل ونى جۇزەگە اسىرۋعا 3،2 ملرد تەڭگە ءبولىنىپ، 120-دان استام نەسيە بەرۋ جوسپارلانۋدا.
«الاتاۋ» يپوتەكاسىنىڭ شارتتارى: جىلدىق 5% مولشەرلەمە، باستاپقى جارنا 10%، نەسيەنىڭ ەڭ جوعارى سوماسى — 30 ملن تەڭگەگە دەيىن. ماڭىزدى شەكتەۋ: پاتەردى تەك جاڭا عيماراتتان جانە تەك قونايەۆ قالاسىنان ساتىپ الۋعا بولادى. سونداي-اق، مەنشىگىندە تۇرعىن ءۇيى جوق ازاماتتار عانا قاتىسا الادى.
باعدارلاما بەلگىلى ءبىر سالا قىزمەتكەرلەرىنە باعىتتالعان: ءبىلىم بەرۋ، دەنساۋلىق ساقتاۋ، مادەنيەت، سپورت، الەۋمەتتىك سالا، ەنەرگەتيكا جانە كوممۋنالدىق شارۋاشىلىق، مەملەكەتتىك قىزمەت، سونداي-اق ب ا ق (بۇل سانات 2026 جىلى قوسىلعان).
وتىنىمدەر قونايەۆ قالاسىنداعى «شاحنۋر» بيزنەس-ورتالىعىندا قابىلدانادى. قابىلداۋ كەستەسى: دۇيسەنبىدەن جۇماعا دەيىن 9:00-دەن 18:00-گە دەيىن، سەنبىدە 13:00-گە دەيىن. الدىمەن قۇجاتتاردى اكىمدىك تەكسەرەدى، سودان كەيىن وبلىستىق كوميسسيا قارايدى. قاتىسۋشىلاردى ىرىكتەۋ بالدىق جۇيە بويىنشا جۇرگىزىلەدى: رەسمي نەكە — 2 بالل؛ كامەلەتكە تولماعان بالالار — 2 بالل، ءاربىر كەلەسى بالاعا قوسىمشا 1 بالل؛ ەڭبەك ءوتىلى (كەمىندە ەكى جىل) — 2 بالل، ءاربىر كەلەسى جىلعا 1 بالل؛ مەملەكەتتىك قىزمەتتە نەمەسە بيۋدجەتتىك سالادا جۇمىس ىستەۋ — 5 بالل؛ الەم چەمپيونى نەمەسە ازيا ويىندارىنىڭ چەمپيونى اتاعى، ونىڭ ىشىندە پاراليمپياداشىلار — 7 بالل.
كونكۋرس جەڭىمپازدارى «وتباسى بانككە» جولداما الادى، وندا تابىس پەن نەسيە تاريحى تەكسەرىلەدى. ەگەر تابىس جەتكىلىكسىز بولسا، ەكى كەپىلگەر تارتۋعا بولادى.
ەسكە سالا كەتەيىك، قازاقستاندا 2%-دان 5%-عا دەيىنگى مولشەرلەمەمەن يپوتەكالىق باعدارلامالار دا بار، ولارعا تۇرعىن ءۇي كەزەگىندە تۇرعان الەۋمەتتىك وسال ازاماتتار قاتىسا الادى.