الماتى قالالىق ورتالىق كلينيكالىق اۋرۋحاناسىندا مەديسينالىق كورسەتىلىمدەر بولعان جاعدايدا ءامس جانە تمككك شەڭبەرىندە ومىرتقاعا جاسالاتىن كۇردەلى وتالار تەگىن جۇرگىزىلەدى. ارالاسۋ كەزىندە روبوت-اسسيستەنتتىك تەحنولوگيالار مەن نەيروناۆيگاسيا جۇيەسى قولدانىلادى، دەپ حابارلايدى infohub.kz سايتى.
اۋرۋحانادا، اتاپ ايتقاندا، ترانسپەديكۋليارلىق بۇراندالار ورناتۋ ارقىلى ومىرتقا كانالىنىڭ دەكومپرەسسياسى جاسالادى. نەيروناۆيگاسيا جانە روبوت-اسسيستەنتتىك تەحنولوگيالار دارىگەرلەرگە ارالاسۋدى دالىرەك جوسپارلاۋعا جانە يمپلانتتاردى ورناتۋعا مۇمكىندىك بەرەدى.
مۇنداي جوعارى تەحنولوگيالىق وتالاردى اقىلى نەگىزدە جاساتقاندا قۇنى 5 ملن تەڭگەگە جەتۋى مۇمكىن.
ۆەدومستۆو وتا قاجەتتىلىگى تۋرالى شەشىمدى دارىگەرلەر مەديسينالىق كورسەتىلىمدەر نەگىزىندە قابىلدايتىنىن اتاپ ءوتتى. ەگەر شەشىم قابىلدانسا، وندا ادامعا وتا ءامس جانە تمككك شەڭبەرىندە تەگىن جاسالادى.
اۋرۋحانادا مۇنداي ارالاسۋلار ومىرتقا مەن جۇيكە جۇيەسىنىڭ اۋىر اۋرۋلارى بار پاسيەنتتەرگە جۇرگىزىلەدى.
وسىنداي وتالاردى جاسايتىن نەيروحيرۋرگتەردىڭ ءبىرى — مارات الماتوۆ. ول الماتى قالالىق ورتالىق كلينيكالىق اۋرۋحاناسىندا 20 جىلدان استام جۇمىس ىستەيدى جانە وسى ۋاقىت ىشىندە مىڭنان استام پاسيەنتكە وتا جاساعان.
بۇعان دەيىن قازاقستاندا ءامس جۇيەسىندەگى جالعان جازبالارمەن جاڭاشا كۇرەسەتىنى بەلگىلى بولعان ەدى. بۇعان كۇدىكتى سحەمالاردى انىقتاپ، تولەمدەردى بۇعاتتايتىن جاڭا سيفرلىق پلاتفورما كومەكتەسۋى ءتيىس. اتاپ ايتقاندا، ەگەر بۇرىن نەگىزگى جۇمىس اقشا اۋدارىلعاننان كەيىن بۇزۋشىلىقتاردى انىقتاۋعا قۇرىلعان بولسا، ەندى جاڭا مودەل قاراجات اۋدارىلعانعا دەيىن اۋىتقۋلاردى انىقتايتىن بولادى.