سوڭعى سەگىز جىلدا الماتىدا قاتەرلى ىسىكتەن بەس جىلدىق ءومىر ءسۇرۋ كورسەتكىشى 46%-دان 75%-عا ءوستى. بۇل جەتىستىكتى وزىق تەحنولوگيالاردى، سونىڭ ىشىندە قالالىق ونكوورتالىقتاعى روبوتتىق حيرۋرگيالىق جۇيەنى ەنگىزۋمەن بايلانىستىرادى. ەمدەۋدىڭ جاڭا ادىستەرىمەن الماتى ونكوورتالىعىنا بارعان دەنساۋلىق ساقتاۋ ءمينيسترى اقمارال النازاروۆا تانىستى، دەپ حابارلايدى infohub.kz سايتى.
دەنساۋلىق ساقتاۋ مينيسترلىگىنىڭ باسشىسىنا روبوتتىق حيرۋرگيالىق جۇيە ءداستۇرلى ۇلكەن تىلىكتەردىڭ ورنىنا شاعىن تەسىكتەر ارقىلى كۇردەلى از ءينۆازيۆتى وتالار جاساۋعا مۇمكىندىك بەرەتىنى ايتىلدى.
ونكولوگتاردىڭ ايتۋىنشا، قۇرىلعىنىڭ جوعارى دالدىگى ءىرى قان تامىرلارىنىڭ زاقىمدالۋ ءقاۋپىن ازايتىپ، قان قۇيۋ قاجەتتىلىگىن تومەندەتەدى. روبوتتىق ارالاسۋلار كەزىندە اسقىنۋلاردىڭ، قابىنۋ پروسەستەرىنىڭ جانە ينفەكسيالاردىڭ ىقتيمالدىعى دا ازايادى.
مۇنداي وتالاردان كەيىن ناۋقاستار الدەقايدا از اۋىرسىنۋ سەزىنەدى، ستاسيوناردا ازىراق ۋاقىت جاتادى جانە ادەتتەگى ءومىر سالتىنا تەزىرەك ورالادى.
سونىمەن قاتار روبوت حيرۋرگكە وپەراسيا الاڭىن ۇلكەيتىلگەن ءۇش ولشەمدى بەينەدە كورۋگە مۇمكىندىك بەرەدى، سونىڭ ارقاسىندا ەڭ ۇساق جۇيكەلەر مەن قان تامىرلارى انىق كورىنەدى. جۇيە قوزعالىستىڭ جوعارى دالدىگىن قامتاماسىز ەتىپ، حيرۋرگتىڭ قولىنىڭ دىرىلدەۋىن تولىق وتەيدى.
قازىرگى تاڭدا قالادا 38 مىڭنان استام ونكولوگيالىق ناۋقاس ەسەپتە تۇر، جىل سايىن 27 مىڭنان استام ادام مەديسينالىق كومەك الادى. سوڭعى سەگىز جىلدا كورسەتىلەتىن ەمدەۋ قىزمەتىنىڭ كولەمى ەكى جارىم ەسە وسكەنى اتاپ ءوتىلدى.
بۇعان دەيىن «كۋرسيۆ» الماتىدا جاڭا زاماناۋي ونكوورتالىق سالىناتىنىن جازعان بولاتىن. جوبا مەملەكەتتىك ساراپتامادان ءوتتى. ونى روبوتوتەحنيكاسى بار وپەراسيالىق بلوكپەن، مولەكۋلالىق-گەنەتيكالىق زەرتحانامەن جانە پرەپاراتتاردى دايىندايتىن اۆتوماتتى جۇيەمەن جابدىقتاۋعا ۋادە بەرىلدى.