الماتىداعى ماسعۇت ايقىمبايەۆ اتىنداعى اسا ءقاۋىپتى ينفەكسيالار ۇلتتىق عىلىمي ورتالىعىندا 21 قىركۇيەكتە بولعان ءورت توڭىرەگىندەگى مانيپۋلياسيالىق حابارلامالاردىڭ تاراۋى وسى ناقتى وقيعانى رەسەيدە وبا بولدى دەگەن قاۋەسەتپەن بايلانىستىرۋ ارەكەتىمەن ۇشتاسىپ جاتىر، دەپ حابارلايدى infohub.kz سايتى.
NUR.KZ اگەنتتىگى دەزينفورماسياعا قارسى كۇرەس ورتالىعىنا سىلتەمە جاساپ حابارلاۋىنشا، ءتيىستى مانيپۋلياسيالىق ماتەريالدار سوڭعى كۇندەرى جەلىدە تاراي باستاعان.
«سوڭعى كۇندەرى ءورتتىڭ ناقتى فاكتىسى توڭىرەگىندە كەيبىر اككاۋنتتار بولعان وقيعانى بۇعان دەيىن رەسەيلىك بيلىك رەسمي تۇردە جوققا شىعارعان رەسەيدەگى وبا جاعدايى تۋرالى قاۋەسەتپەن بايلانىستىرۋعا تىرىسىپ جاتىر. سونىمەن قاتار اسا ءقاۋىپتى ينفەكسيالار ۇلتتىق عىلىمي ورتالىعىندا مامانداندىرىلعان زەرتحانالاردىڭ بولۋى ەكى وقيعا اراسىندا جالعان بايلانىس جاساپ، قوسىمشا ۇرەي تۋدىرۋ ءۇشىن پايدالانىلىپ وتىر»، — دەلىنگەن دەزينفورماسياعا قارسى كۇرەس ورتالىعىنىڭ Telegram-ارناسىندا جاريالانعان حابارلاماسىندا.
دەزينفورماسياعا قارسى كۇرەس ورتالىعى پايدالانۋشىلاردى مانيپۋلياسياعا بەرىلمەۋگە جانە تارالىپ جاتقان اقپاراتتى رەسمي دەرەككوزدەردەن تەكسەرۋگە شاقىرادى.
ەسكە سالايىق، 21 قىركۇيەكتە الماتىداعى عىلىمي ورتالىقتىڭ ەكى قاباتتى اكىمشىلىك عيماراتىنىڭ ەكىنشى قاباتىندا ءورت شىققانى بەلگىلى بولدى. تجد دەرەگىنشە، تۇرمىستىق تەحنيكا مەن زاتتار جانعان.
دەنساۋلىق ساقتاۋ مينيسترلىگى كەيىنىرەك ءورت سالدارىنان مامانداندىرىلعان زەرتحانالاردىڭ زارداپ شەكپەگەنىن ناقتىلادى. زەرتحانالىق جۇمىستار جۇرگىزىلەتىن بولمەلەردى وت شارپىماعان، ولاردىڭ گەرمەتيكالىعى بۇزىلماعان. ينفەكسيالىق اۋرۋلاردىڭ تارالۋ ءقاۋپى مەن حالىققا ءقاۋىپ جوق.
ال جاقىندا ب ا ق رەسەيدىڭ يركۋتسك وبلىسىندا وباعا قارسى ينستيتۋت قىزمەتكەرىنىڭ وبا كۇدىگىمەن كوز جۇمعانىن حابارلادى. كەيىن روسپوترەبنادزور ول انىقتالماعان ەتيولوگيالىق پنەۆمونيادان قايتىس بولعانىن مالىمدەدى.