Park Live فەستيۆالىنە كەلگەن قوناقتار ءبىرىنشى مامىر توعاندارىنىڭ ماڭىنان كولىك قوياتىن ورىن ىزدەپ جۇرگەندە، جەرگىلىكتى تۇرعىندار كولىك اعىنىنان پايدا تابۋدى ءجون كوردى. جەكە ءۇي يەلەرى ءوز اۋلالارىنداعى بوس ورىنداردى اقىلى پاركوۆكاعا بەرە باستادى، دەپ حابارلايدى infohub.kz.
Park Live 21-23 تامىز ارالىعىندا ءبىرىنشى مامىر توعاندارىنىڭ اۋماعىندا ءوتتى. فەستيۆال ونداعان مىڭ كورەرمەندى جينادى، ال حەدلاينەرلەرى Gorillaz، The Offspring جانە دجەك ۋايت بولدى.
فەستيۆال قوناقتارى ءۇشىن باستى ماسەلەلەردىڭ ءبىرى الاڭ ماڭىنداعى پاركوۆكا بولدى. كولىك كوپ بولعاندىقتان، بوس ورىندار تەز ءبىتىپ، ماڭايداعى ۇيلەردىڭ تۇرعىندارى ابىرجۋدان پايدا تابۋدىڭ جولىن تاپتى.
تۇسىرىلگەن كادرلارعا قاراعاندا، كوشەدە بالالار مەن جاسوسپىرىمدەر قولدان جاسالعان «پاركوۆكا» دەگەن جازۋى بار تاقتايشالارمەن تۇرىپ، جۇرگىزۋشىلەرگە بوس ورىنداردى ۇسىنعان. باعاسى 3-5 مىڭ تەڭگە ارالىعىندا بولعان.
كونسەرتتەن كەيىن قالاعا تاكسيمەن قايتقىسى كەلگەندەر دە قيىندىققا تاپ بولدى. فەستيۆال قوناقتارىنىڭ ايتۋىنشا، كونسەرتتەن كەيىن جول اقىسى ايتارلىقتاي وسكەن. كەيبىر جۇرگىزۋشىلەر ءبىر كولىك ءۇشىن 30 مىڭ تەڭگەگە دەيىن سۇراعان. باسقالارى ءبىر ادامنان 3-5 مىڭ تەڭگەگە جول ءجۇرۋدى ۇسىنعان.
بۇعان دەيىن Kursiv LifeStyle Park Live-دە حەدلاينەر Gorillaz توبى ونەر كورسەتكەنىن جازعان ەدى. الايدا قازنەت قولدانۋشىلارى تەك كونسەرتتى عانا ەمەس، ءانشى ءارى توپ نەگىزىن قالاۋشى دەيمون البارننىڭ بەينەسىن دە تالقىلاعان.