الماتى پوليسياسى امەريكالىق رەپەر كانە ۋەستتىڭ الداعى كونسەرتىنە بيلەت ساتىپ الۋ كەزىندە الاياقتىق سحەمالار بولۋى مۇمكىن ەكەنىن ەسكەرتىپ، جانكۇيەرلەرگە ۇندەۋ جاسادى، دەپ حابارلايدى infohub.kz سايتى.
الماتى پوليسيا دەپارتامەنتى بيلەتتەردى تەك رەسمي ساتۋ سەرۆيستەرى ارقىلى ساتىپ الۋدى قاتاڭ ۇسىنادى. ءتارتىپ ساقشىلارى ماڭىزدى ءبىر جايتتى ءتۇسىندىردى: تولەم جاسالعاننان كەيىن ساتىپ الۋشى ۆاۋچەر الادى، ول 13 تامىزدا بىرەگەي QR-كودى بار ەلەكتروندى بيلەتكە اۆتوماتتى تۇردە اينالادى. اتالعان كۇنگە دەيىن QR-كودى بار دايىن بيلەتتەر جوق، سوندىقتان الەۋمەتتىك جەلىلەر مەن مەسسەندجەرلەردە مۇنداي بيلەتتەردى «قولدان» ساتۋ تۋرالى كەز كەلگەن ۇسىنىس الاياقتىق بولۋى مۇمكىن.
پوليسيا بيلەتتەردى قايتا ساتۋ دا تەك رەسمي جولمەن جۇزەگە اسىرىلاتىنىن اتاپ ءوتتى: بۇل جاعدايدا بۇرىنعى ۆاۋچەر جويىلىپ، جاڭا يەسىنە جاڭاسى رەسىمدەلەدى. ءانشىنىڭ جانكۇيەرلەرى بەيتانىس ادامدارعا اقشا اۋدارماۋعا جانە اقپاراتتى تەك ءىس-شارا ۇيىمداستىرۋشىلارىنىڭ رەسمي ارنالارى ارقىلى تەكسەرۋگە شاقىرىلادى.
ەسكە سالايىق، 17 شىلدەدە كانە ۋەستتىڭ الماتىداعى كونسەرتى تۋرالى اقپارات پايدا بولدى. الدىمەن بۇل تۋرالى ونىڭ مەنەدجەرى دجوزەف كاررە حابارلادى، كەيىن الماتى اكىمدىگى ونەرپازدىڭ 14 تامىزدا ساعات 21:00-دە ورتالىق ستاديوندا ونەر كورسەتەتىنىن راستادى. بۇعان دەيىن پوليسيا جەلىدە الاياقتاردىڭ بۇل وقيعاعا جوق بيلەتتەردى ساتىپ جاتقانىن حابارلاعان بولاتىن.