الەۋمەتتىك جەلىلەردە الماتى وبلىسىنىڭ ءبىر اۋدانىنىڭ پروكۋرورى الماتىداعى ويىن-ساۋىق ورنىندا ۇستالدى دەگەن اقپارات تاراپ، بۇل وقيعاعا قالالىق پوليسيا رەسمي تۇسىنىكتەمە بەردى، دەپ حابارلايدى infohub.kz سايتى.
حابارلاما Threads الەۋمەتتىك جەلىسىندە پايدا بولدى. جاريالانىم اۆتورىنىڭ تۇجىرىمىنشا، الماتى وبلىسى ەڭبەكشىقازاق اۋدانى پروكۋراتۋراسىنىڭ اعا پروكۋرورى الماتىداعى ويىن-ساۋىق ورىندارىنىڭ بىرىندەگى وقيعادان كەيىن ۋاقىتشا ۇستاۋ يزولياتورىنا قامالعان.
«الكوگولدىك ماساڭ كۇيدە الماتىداعى ويىن-ساۋىق ورنىندا قوعامدىق ءتارتىپتى بۇزدى، سونداي-اق پوليسيا قىزمەتكەرلەرىنىڭ زاڭدى تالاپتارىنا باعىنبادى، وسىعان بايلانىستى ۇستالدى»، — دەلىنگەن جازبادا.
سونىمەن قاتار جاريالانىمدا ۇستالعان ادامنىڭ سوڭىندا بوساتىلعانى بولجانادى.
وسى جاريالانىمنىڭ استىنداعى پىكىرلەردە الماتى پوليسيا دەپارتامەنتى اتالعان فاكتى بويىنشا «102» پۋلتىنە قالاداعى ءبىر مەكەمەدەگى جانجالدى جاعداي تۋرالى حابارلاما تۇسكەنىن مالىمدەدى.
«وقيعاعا قاتىسۋشىلار المالى اۋدانىنىڭ پوليسيا باسقارماسىنا جەتكىزىلدى. وسى فاكتى بويىنشا تەكسەرۋ جۇرگىزىلىپ، ونىڭ ناتيجەسى بويىنشا ءتيىستى شەشىم قابىلدانادى»، — دەدى پوليسيادا.
NUR.KZ ءتىلشىسى دە الماتى وبلىسىنىڭ پروكۋراتۋراسىنان تۇسىنىكتەمە سۇراپ حابارلاستى.