الماتىدا عيماراتتى بۇزۋ جۇمىستارىمەن اينالىسقان جۇمىسشى مەن جەرگىلىكتى تۇرعىن اراسىندا جانجال شىقتى. اۋىزشا داۋ-داماي پىشاق ۇرۋمەن ۇلاستى، دەپ حابارلايدى infohub.kz.
الماتى پوليسيا دەپارتامەنتىنىڭ مالىمەتىنشە، بوستاندىق اۋدانىندا دەنساۋلىققا اۋىر زيان كەلتىرگەن كۇدىكتى ۇستالدى.
"توتەنشە قىزمەتتەر پۋلتىنە پىشاق جاراقاتى تۋرالى حابارلاما تۇسكەن. وقيعا ورنىنا كەلگەن دارىگەرلەر كەۋدە تۇسىنان جارالانعان جاس جىگىتتى اۋرۋحاناعا جاتقىزدى. ال "بۋران-405" پاترۋلدىك ەكيپاجى ءىزىن سۋىتپاي، كۇدىكتىنى ۇستادى. الدىن الا اقپارات بويىنشا، ەر ادامدار اراسىندا بۇرىن دا جانجال بولعان. بىرنەشە كۇننەن كەيىن اۋىزشا داۋ قايتا تۇتانىپ، سۋىق قارۋ قولدانۋمەن اياقتالدى"، — دەلىنگەن حابارلامادا.
كۇدىكتىنىڭ ەسكى عيماراتتى بۇزۋ بريگاداسىندا جۇمىس ىستەگەنى، ال جابىرلەنۋشىنىڭ ماڭايداعى ۇيلەردىڭ ءبىرىنىڭ تۇرعىنى ەكەنى انىقتالدى. وقيعانىڭ ءمان-جايى مەن سەبەپتەرى انىقتالۋدا.
"دەنساۋلىققا اۋىر زيان كەلتىرۋ فاكتىسى بويىنشا قىلمىستىق ءىس قوزعالدى. كۇدىكتى ۋاقىتشا ۇستاۋ يزولياتورىنا قامالدى. پوليسەيلەر تەرگەۋ شارالارىن جۇرگىزۋدە، ونىڭ ىشىندە قىلمىس قۇرالىنىڭ ورنالاسقان جەرىن انىقتاۋ جۇمىستارى ءجۇرىپ جاتىر"، — دەپ ناقتىلادى پد.