الماتىنىڭ اۋەزوۆ اۋدانىندا بۇرىنعى تۇراق ورنىندا QADAM سكۆەرى بوي كوتەرىپ جاتىر. قوعامدىق كەڭىستىكتى قازان ايىنىڭ سوڭىنا دەيىن اشۋ جوسپارلانىپ وتىر، دەپ حابارلايدى infohub.kz سايتى.
وڭتۇستىك استانا اكىمدىگىنىڭ مالىمەتىنشە، الماتى اكىمى دارحان ساتىبالدى جۇمىس ساپارى بارىسىندا ساين مەن ۋلۋگبەك كوشەلەرىنىڭ قيىلىسىندا ورنالاساتىن سكۆەردىڭ قۇرىلىس بارىسىمەن تانىستى.
اكىمدىك دەرەگىنشە، بۇرىنعى تۇراق ورنىندا اۋدانى 0،35 گا زاماناۋي سكۆەر سالىنۋدا. ول اۋدان تۇرعىندارىنىڭ دەمالىسىنا، سەرۋەندەۋىنە جانە بەلسەندى ۋاقىت وتكىزۋىنە ارنالعان جاڭا كەڭىستىككە اينالماق.
سكۆەردە ءتۇرلى تابيعي جابىندىلارى بار تاكتيلدى اللەيا، بالالار الاڭى، جۇگىرۋ جولى، سىرعاناۋ جانە پاركۋر ايماقتارى، سەرۋەندەۋ كەڭىستىكتەرى مەن جاسىل جەلەك قاراستىرىلعان.
ونىڭ باستى ەلەمەنتتەرىنىڭ ءبىرى — فونتان، جارىقتاندىرۋ جانە «بولاشاققا قادام» دەگەن جازۋى بار اركالىق كومپوزيسيا. QADAM تۇجىرىمداماسى قوزعالىس، ءتۇرلى فاكتۋرالار، دىبىس، سۋ مەن جارىقتىڭ ۇيلەسىمىنە نەگىزدەلگەن.