الماتىدا قالا كۇنىنىڭ مەرەكەسى استانا الاڭىندا شارىقتاۋ شەگىنە جەتتى. مۇندا اۋقىمدى Almaty Vibes مۋزىكالىق فەستيۆالى مەن مۋلتيمەديالىق 3D Mapping Show ءوتتى، دەپ حابارلايدى infohub.kz سايتى.
كونسەرتتىك باعدارلاماعا تانىمال قازاقستاندىق ارتىستەر قاتىستى: ماقپال ءجۇنىسوۆا، ميراس جۇگىنىسوۆ، KALIFARNIYA، ALPHA، ايدانا مەدەنوۆا، جاندوس قارجاۋباي، تورەعالي تورەالى، «الاش ۇلى» توبى جانە باسقا دا ورىنداۋشىلار.
استانا الاڭىنا مەرەكەنى بىرگە اتاپ ءوتۋ ءۇشىن بىرنەشە مىڭ كورەرمەن جينالدى. قوناقتار ارتىستەرمەن بىرگە ءان سالىپ، بي بيلەپ، قازاقستاندىق جۇلدىزداردىڭ ونەرىن جىلى قارسى الدى. كورەرمەندەرگە الماتىعا، ونىڭ اتموسفەراسىنا جانە سۇيىكتى ورىندارىنا ارنالعان اندەر ەرەكشە اسەر ەتتى.
كەشتىڭ ەڭ جارقىن وقيعالارىنىڭ ءبىرى – الماتىنىڭ دامۋ تاريحىن، تانىمال ساۋلەت نىساندارىن جانە زاماناۋي سيفرلىق تەحنولوگيالاردى بىرىكتىرگەن مۋلتيمەديالىق 3D Mapping Show بولدى.
استانا الاڭىنا قاراعان قبتۋ عيماراتىنىڭ قاسبەتى اۋقىمدى ەكرانعا اينالدى. جارىق پەن ۆيزۋالدىق ەففەكتىلەردىڭ ارقاسىندا وندا قالا تاريحى اشىلىپ، كورەرمەندەر تانىس الماتىنى ەرەكشە سيفرلىق فورماتتا كورە الدى.
مەرەكەلىك باعدارلاما تۋرالى اسەرىمەن فەستيۆالگە 10 جاسار قىزى مەدينامەن بىرگە كەلگەن قالا تۇرعىنى ايگەرىم ماحمەتوۆا ءبولىستى.
«بۇگىن الاڭداردا اسەم سالتاناتتار ءوتىپ جاتىر، ال فەستيۆالدەگى قازاقستاندىق جۇلدىزداردىڭ ونەرى سونشا قۋانىش پەن جاعىمدى ەموسيا سىيلايدى. مۋلتيمەديالىق شوۋ ءبىزدىڭ الماتىنىڭ تاريحى مەن ساۋلەتىن وتە اسەرلى ءارى تىڭ تۇردە كورسەتتى. بارلىق الماتىلىقتارعا وسىنداي اتموسفەرانى ءاردايىم ساقتاۋدى – ءبىر-بىرىن قولداپ، سۇيىكتى قالامىزدى بىرگە دامىتۋدى تىلەيمىن»، – دەدى ايگەرىم ماحمەتوۆا.
ەسكە سالايىق، الماتىدا ءداستۇرلى تۇردە قىركۇيەكتىڭ ءۇشىنشى جەكسەنبىسىندە اتاپ وتىلەتىن قالا كۇنىنە وراي مەرەكەلىك ءىس-شارالار ءوتىپ جاتىر. قالانىڭ ءتۇرلى الاڭدارىندا مەگاپوليس تۇرعىندارى مەن قوناقتارى ءۇشىن كونسەرتتەر، فەستيۆالدەر، قويىلىمدار جانە باسقا دا ءىس-شارالار ۇيىمداستىرىلۋدا.