بولاشاق مەديسيناسى شىندىققا اينالۋدا: الماتى ونكوورتالىعىندا ەلىمىزدە العاش رەت اسقازانعا روبوتتىڭ كومەگىمەن وتا جاسالدى. اعزانىڭ ءبىر بولىگى قورقىنىشتى تىلىكتەرسىز، كىشكەنتاي تەسىكتەر ارقىلى الىندى، دەپ حابارلايدى infohub.kz سايتى.
وتا بارىسىندا دارىگەرلەر ICG-ناۆيگاسيا جۇيەسىن قولداندى. بۇل جۇيە وزىندىك «جارىقتاندىرۋ» رەتىندە جۇمىس ىستەپ، حيرۋرگكە بارلىق تىندەر مەن تامىرلاردى انىق كورۋگە مۇمكىندىك بەرەدى. سونىمەن قاتار، ەمدەۋ ستاندارتتارىنا سايكەس ناۋقاستىڭ زاقىمدالعان جانە وعان ىرگەلەس ليمفا تۇيىندەرى دەرەۋ الىنىپ تاستالدى (D2 ليمفوديسسەكسيا)، بۇل اۋرۋدىڭ ودان ءارى تارالۋىن بولدىرماۋ ءۇشىن جاسالدى.
الماتى ونكوورتالىعىنىڭ ونكوحيرۋرگيا ءبولىمىنىڭ مەڭگەرۋشىسى نۇرلان بالتاەۆتىڭ تۇسىندىرۋىنشە، روبوجۇيە حيرۋرگكە وتانى جوعارى دالدىكپەن ورىنداۋعا كومەكتەسەدى.
«ءبىز وپەراسيا الاڭىن ۇلكەيتىلگەن ءۇش ولشەمدى كەسكىندە كورەمىز، اناتوميالىق قۇرىلىمداردى ەگجەي-تەگجەيلى قاراپ، قيىن جەرلەردە كۇردەلى مانيپۋلياسيالاردى ورىنداي الامىز. سونىمەن قاتار، جۇيە حيرۋرگتىڭ قولىنىڭ تابيعي ميكرو دىرىلدەۋىن سۇزەدى»، — دەدى ول.
روبوت-اسسيستەنتتى حيرۋرگيانىڭ ناۋقاس ءۇشىن باستى ارتىقشىلىعى — ۇلكەن جانە اۋىرتپالىقتى تىگىستەردىڭ بولماۋى. كۇردەلى مانيپۋلياسيالار بىرنەشە ۇقىپتى تەسىك ارقىلى جاسالادى، بۇل تىندەردىڭ جاراقاتتانۋىن ازايتىپ، ادامنىڭ تەزىرەك ساۋىعۋىنا كومەكتەسەدى.
الماتى ونكوورتالىعى ءۇشىن بۇل — 15ء-شى وسىنداي وتا. بۇعان دەيىن جەرگىلىكتى ماماندار اقىلدى تەحنيكانىڭ كومەگىمەن ىشەك، بۇيرەك، قۋىق استى بەزى جانە جاتىر ىسىكتەرىن ءساتتى الىپ تاستاعان.
دەنساۋلىق ساقتاۋ مينيسترلىگىنىڭ مالىمەتىنشە، ورتالىقتا جىل سايىن 3 مىڭنان استام وتا جاسالادى، ونىڭ 60%-ى از ءينۆازيۆتى ادىسپەن وتەدى.
بۇعان دەيىن «كۋرسيۆ» 433 ملن تەڭگەگە ساتىپ الىنعان روبوت-حيرۋرگ شىعىس قازاقستاندا ناۋقاستاردى قۇتقارا باستاعانىن جازعان بولاتىن.