الماتىدا «يننوۆاسيالىق تەحنولوگيالار پاركى» ارنايى ەكونوميكالىق ايماعىنىڭ الاڭىندا جاساندى ينتەللەكت تەحنولوگيالارىن قولداناتىن روبوتتار ءوندىرىسى ىسكە قوسىلادى. NERO Group كومپانياسى قىتايلىق UBTECH Robotics-پەن بىرلەسىپ وسىنداي ءونىم شىعارۋدى جەرگىلىكتەندىرەدى. جوباعا سالىناتىن جالپى ينۆەستيسيا كولەمى 440 ميلليون دوللارعا باعالانىپ وتىر، دەپ حابارلايدى infohub.kz سايتى.
باستامانىڭ ەگجەي-تەگجەيىن NERO Group باسشىسى ەرلان نابييەۆ «قازاقستان – جۇڭگو» ينۆەستيسيالىق فورۋمىندا ايتىپ بەردى. قىتايداعى روبوت وندىرۋشىلەردىڭ ءبىرى — UBTECH Robotics كومپانياسىمەن كەلىسىمگە ءالى شىلدەدە قول قويىلعان. جاريالانعان سومانىڭ 340 ميلليون دوللارى UBTECHء-تىڭ گۋمانويدتى روبوتتار ءوندىرۋ تەحنولوگياسىن ترانسفەرتتەۋگە تيەسىلى، ال 100 ميلليون دوللارى NERO Group-تىڭ جەكە ينۆەستيسياسى.
«بۇل — تەك وندىرىستىك بولىكتى جەرگىلىكتەندىرۋ ەمەس. بۇل — R&D (زەرتتەۋ جانە ازىرلەۋ)، زەرتتەۋلەر، باعدارلامالاۋ، كوپتەگەن جۇمىس ورنىن قۇرۋ، سونداي-اق، ارينە، وندىرىستىك الاڭدار. ايتا كەتەيىن، «يتپ» اەا اۋماعىندا وسى قاجەتتىلىكتەرگە ارنالعان 25 مىڭ شارشى مەترلىك ۇلكەن ورتالىق سالىپ جاتىرمىز»، – دەدى ەرلان نابييەۆ.
كومپانيا باسشىسىنىڭ ايتۋىنشا، باستى نازار ويىن-ساۋىق باعىتىنا ەمەس، روبوتتاردى ءبىلىم بەرۋ، قىزمەت كورسەتۋ، ءوندىرىس، لوگيستيكا جانە الەۋمەتتىك قولداۋ سالالارىندا قولدانۋعا اۋدارىلادى.
NERO Group روبوتوتەحنيكانى ءبىلىم بەرۋگە ەنگىزۋگە ەرەكشە كوڭىل بولمەك. كومپانيا باسشىسى وقۋشىلار روبوتتاردى قۇراستىرىپ، ولاردى باعدارلامالاپ، وزدەرىنىڭ قازاقستاندىق روبوتتارىن جاساي ءبىلۋى كەرەكتىگىن اتاپ ءوتتى. مەملەكەتتىك باعدارلاما اياسىندا كومپانيا مەكتەپتەرگە وسىعان قاجەتتى قۇرال-جابدىقتى تەگىن بەرەدى.
«الماتى قالاسى اكىمدىگىنىڭ تاپسىرماسى بويىنشا وسى جىلدىڭ سوڭىنا دەيىن قالانىڭ 30-عا جۋىق مەكتەبىن روبوتتارمەن قامتاماسىز ەتۋدى ماقسات ەتىپ وتىرمىز. كەلەسى جىلى، 2028 جىلعا قاراي، قالعان 200-دەن استام مەكتەپتى دە قامتيمىز. 50 مىڭ ءبىلىم بەرۋ روبوتوكەشەنىن شىعارۋ جوسپارلانىپ وتىر، ياعني بۇل — روبوتوتەحنيكا جيناقتارى. سەرۆيستىك جانە گۋمانويدتى روبوتتارعا كەلەتىن بولساق، جەرگىلىكتەندىرۋدى كەلەسى جىلدىڭ، 2027 جىلدىڭ ەكىنشى توقسانىنان باستايمىز. وندىرىستىك قۋاتى 1 مىڭ روبوت دەڭگەيىندە جاريالاندى»، – دەدى NERO Group باسشىسى.
بۇعان دەيىن الماتىدا گۋمانويدتى جانە ءبىلىم بەرۋ روبوتتارىن شىعاراتىن زاۋىت سالىناتىنى حابارلانعان. ول الەمدەگى روبوتوتەحنيكا سالاسىنىڭ كوشباسشىلارىنىڭ ءبىرى — UBTECH Robotics كومپانياسىنىڭ شەتەلدەگى العاشقى وندىرىستىك كاسىپورنى بولادى.