الماتى قالاسىنىڭ سانيتارلىق-ەپيدەميولوگيالىق باقىلاۋ باسقارماسى الەۋمەتتىك جەلىلەردە تاراعان، قالا تۇرعىندارىن «قۇلاتاتىن» بەلگىسىز ۆيرۋس تۋرالى جازبالارعا جاۋاپ بەردى، دەپ حابارلايدى infohub.kz سايتى.
وڭىرلىك كوممۋنيكاسيالار قىزمەتىندە وتكەن بريفينگتە باسقارما باسشىسىنىڭ ورىنباسارى گاۋحار كاتكەنوۆا ايتقانداي، زەرتحانالىق مونيتورينگ ناتيجەلەرى بويىنشا الماتىدا ءقازىر رينوۆيرۋس، پاراگريپپ، رس-ۆيرۋسى جانە ماۋسىمدىق كوروناۆيرۋس اينالىمدا ءجۇر.
«باسقا جاڭا، بەيمالىم جانە بۇرىن كەزدەسپەگەن ۆيرۋستار جوق. جىل بويى تالداۋ الىپ، زەرتحانالىق زەرتتەۋ جۇرگىزەتىن جانە قازىرگى ۋاقىتتا قانداي ۆيرۋستار اينالىمدا جۇرگەنىن انىقتايتىن سەگىز ورتالىق بار. زەرتحانالىق مونيتورينگ ناتيجەلەرىنە سايكەس، مەن ايتقان ۆيرۋستار انىقتالدى»، — دەدى كاتكەنوۆا.
سونىمەن قاتار، ول بۇگىندە الماتىلىقتار تۇماۋعا قارسى ەكپە الا الاتىنىن اتاپ ءوتتى. «گريپپول» پرەپاراتى جەرگىلىكتى بيۋدجەت قاراجاتى ەسەبىنەن ءقاۋىپ توبىنداعى ازاماتتار ءۇشىن 250 مىڭ دوزا كولەمىندە ساتىپ الىنعان، ال قالعان ازاماتتار اقىلى تۇردە ەكپە الا الادى.
گاۋحار كاتكەنوۆا الماتىدا توسەك-ورىن قورى مەن رەزەرۆتىك قۋات جەتكىلىكتى ەكەنىن، بۇل بارلىق قاجەتتى پاسيەنتتەردى، سونىڭ ىشىندە بالالار مەن ءقاۋىپ توبىنداعى ازاماتتاردى تولىق كولەمدە اۋرۋحاناعا جاتقىزۋدى قامتاماسىز ەتۋگە مۇمكىندىك بەرەتىنىن قوستى.
«بالالار قالالىق ينفەكسيالىق اۋرۋحاناسىندا بۇگىندە 360 توسەك اشىلعان، ءبىراق تاعى 67 رەزەرۆتىك توسەگىمىز بار. قالالىق كلينيكالىق ينفەكسيالىق اۋرۋحانادا ءقازىر 200 توسەك اشىلعان. قوسىمشا 50 رەزەرۆتىك توسەك اشىلادى. ال قالالىق پەرزەنتحانادا 70 توسەككە ارنالعان ءبىر بولىمشە اشىلعان. ەپيدەميولوگيالىق جاعدايعا بايلانىستى وندا قوسىمشا 10 رەزەرۆتىك توسەك اشىلادى»، — دەدى كاتكەنوۆا.
ول دارى-دارمەك پەن جەكە قورعانىس قۇرالدارىنىڭ تاپشىلىعى بايقالمايتىنىن مالىمدەدى.