الماتى مەن شانحاي ەرەكشە قاجەتتىلىكتەرى بار ادامداردى قولداۋ بويىنشا بىرلەسكەن جۇمىس تۋرالى كەلىسىمگە كەلدى. جۇڭگو دەلەگاسياسىنىڭ ساپارى قورىتىندىسى بويىنشا الماتى ماماندارىنا جۇڭگو حالىق رەسپۋبليكاسىنداعى كلينيكا بازاسىندا وڭالتۋدىڭ وزىق ادىستەمەلەرىن مەڭگەرۋگە مۇمكىندىك بەرەتىن مەموراندۋم دايىندالۋدا، دەپ حابارلايدى infohub.kz سايتى.
الماتى اكىمدىگىنىڭ مالىمەتىنشە، مەگاپوليسكە شانحاي دەلەگاسياسى ەرەكشە قاجەتتىلىكتەرى بار ادامداردى مەديسينالىق جانە الەۋمەتتىك وڭالتۋ سالاسىندا تاجىريبە الماسۋ اياسىندا كەلدى.
قوناقتار №4 قالالىق اۋرۋحانا جانىنداعى تراۆماتولوگيا جانە ورتوپەديا وڭىرلىك ورتالىعىنا بارىپ، وندا ولارعا تىرەك-قيمىل اپپاراتىنىڭ اۋرۋلارى مەن جاراقاتتارى بار ناۋقاستارعا مەديسينالىق كومەك كورسەتۋ جانە وڭالتۋ تاسىلدەرى كورسەتىلدى.
سونىمەن قاتار، دەلەگاسيا «مەيىرىم» وڭالتۋ ورتالىعىندا بولىپ، بالالار مەن ولاردىڭ وتباسىلارىن وڭالتۋ جانە سۇيەمەلدەۋ تاجىريبەسىمەن تانىستى.
جۇمىسپەن قامتۋ بولىگىندە قالالىق ەڭبەك موبيلدىلىگى ورتالىعىندا دەلەگاسياعا كاسىپتىك باعدار بەرۋ، جۇمىسقا ورنالاسۋعا جاردەمدەسۋ جانە جەكە سۇيەمەلدەۋدىڭ قولدانىستاعى قۇرالدارى تانىستىرىلدى. ونىڭ ىشىندە ادامعا جۇمىس ورنىندا بەيىمدەلۋگە كومەكتەسەتىن Job Coach ءتاسىلى تۋرالى ايتىلدى.
ساپار قورىتىندىسى بويىنشا تاراپتار تاجىريبە الماسۋ، بىرلەسكەن باستامالار جانە الەۋمەتتىك وڭالتۋ سالاسىنداعى مامانداردىڭ بىلىكتىلىگىن ارتتىرۋدى كوزدەيتىن ىنتىماقتاستىق تۋرالى مەموراندۋم دايىنداۋعا كەلىستى.
وسى قۇجات اياسىندا الماتىلىق دارىگەرلەر شانحايدىڭ «يانچجي» وڭالتۋ اۋرۋحاناسىنىڭ بازاسىندا پراكتيكالىق تاجىريبە الا الادى دەپ جوسپارلانۋدا. سونداي-اق بىرلەسكەن سەمينارلار مەن وقىتۋ جوسپارلانعان.
بۇعان دەيىن «كۋرسيۆ» قازاقستاننىڭ تاعى ءتورت وبلىسىندا مۇگەدەكتىگى بار بالالاردى ۇيدە وڭالتۋ ىسكە قوسىلاتىنىن جازعان بولاتىن.