الماتىدا ارنايى الەۋمەتتىك قىزمەتتەرگە مۇقتاج بالالارعا قولداۋ كورسەتۋ ورتالىعىنىڭ №1 م.ا. ديرەكتورى، كەيىن ديرەكتورى بولعان ازامات بيۋدجەت قاراجاتىن جىمقىردى جانە ىسىراپ ەتتى دەپ ايىپتالىپ، سوت ۇكىمى شىقتى، دەپ حابارلايدى infohub.kz سايتى.
جوعارعى سوتتىڭ سايتىنداعى سوت كابينەتىندە قارالعان ءىس ماتەريالدارىنا سايكەس، ا. 2024 جىلدان باستاپ ورتالىق ديرەكتورىنىڭ مىندەتىن اتقارۋشى بولعان، ال 2026 جىلدىڭ باسىندا ديرەكتور بولىپ تاعايىندالعان. ونىڭ وكىلەتتىگىنە مەكەمەنىڭ كادرلىق جانە قارجى-شارۋاشىلىق پروسەستەرىن باقىلاۋ، ونىڭ ىشىندە قىزمەتكەرلەردى قابىلداۋ جانە راسىمدەۋ، جالاقى ەسەپتەۋ جانە تولەۋ، سونداي-اق بيۋدجەت قاراجاتىنىڭ قوزعالىسى كىرگەن.
ۇكىمگە سايكەس، لاۋازىمدى تۇلعا رەتىندە ول الدىمەن ەكى ادامدى جالعان جۇمىسقا ورنالاستىرعان، ولار وعان بانك كارتالارىن بەرگەن، ءبىراق ءىس جۇزىندە ەڭبەك مىندەتتەرىن اتقارماعان. اۋدارىلعان جالاقىنى ول قولما-قول اقشاعا اينالدىرىپ، ءوز قالاۋى بويىنشا جۇمساۋدى كوزدەگەن. كەيىن وسىلايشا تاعى بىرنەشە ادام جۇمىسقا قابىلدانىپ، ولار ءوز جالاقىلارىن وعان بەرىپ وتىرعان.
بارلىعى جالعان قىزمەتكەرلەرگە 6 471 074 تەڭگە جالاقى ەسەپتەلگەن، ودان مىندەتتى تولەمدەر ۇستالعان. ءىس جۇزىندە ولاردىڭ شوتتارىنا بيۋدجەت قاراجاتىنان 5 300 452 تەڭگە اۋدارىلعان.
«وسىلايشا، ا. مەملەكەتتىك فۋنكسيالاردى ورىنداۋعا ۋاكىلەتتى تۇلعالارعا تەڭەستىرىلگەن تۇلعا بولا وتىرىپ، وزىنە سەنىپ تاپسىرىلعان بوتەن م ۇلىكتى قىزمەت بابىن پايدالانىپ، يەمدەنۋ جانە ىسىراپ ەتۋ جولىمەن ءىرى مولشەردە جىمقىردى، ياعني قك 189-بابى 3-بولىگىنىڭ 1، 2-تارماقتارىندا كوزدەلگەن قىلمىستىق قۇقىق بۇزۋشىلىق جاسادى»، — دەلىنگەن ۇكىمدە.
وعان جىمقىرۋ رەتىندە 5 300 452 تەڭگە، ال ىسىراپ ەتۋ رەتىندە ءۇشىنشى تۇلعالاردىڭ پايداسىنا 1 170 622 تەڭگە تاعىلعانى اتاپ وتىلگەن. ا. ءوزى كىناسىن مويىنداپ، وكىنگەن.
سوت كىنانى مويىنداۋدى، شىن جۇرەكتەن وكىنۋدى، العاشقى سوتتىلىقتى، جەسىر قالعان ا.-نىڭ جالعىز ءوزى تاربيەلەپ وتىرعان كامەلەتكە تولماعان بالاسىنىڭ بولۋىن، كەلتىرىلگەن ماتەريالدىق زياندى تولىق وتەۋدى جانە جابىرلەنۋشى تاراپتىڭ تالاپ-ارىزىنىڭ جوقتىعىن ەسكەردى.
ناتيجەسىندە سوت ا.-نى كىنالى دەپ تانىپ، ونى ەڭ تومەنگى قاۋىپسىزدىك مەكەمەسىندە جازاسىن وتەيتىن ەكى جىلعا باس بوستاندىعىنان ايىرۋعا جانە مەملەكەتتىك قىزمەتتە لاۋازىمداردى ءومىر بويى اتقارۋ قۇقىعىنان ايىرۋعا سوتتادى. ا.-نىڭ جازاسىن وتەۋى بەس جىلعا كەيىنگە شەگەرىلدى.