الماتىدا ديپلوم تاپسىرۋ سالتاناتىندا تۇلەكتىڭ قۇجاتىن كوپشىلىك كوزىنشە جىرتىپ تاستاعان ۆيدەوسى الەۋمەتتىك جەلىدە كەڭ تاراپ، قىزۋ تالقىعا ءتۇستى، دەپ حابارلايدى Azattyq Ruhy سايتى.
جازبادا جاس جىگىتتىڭ ديپلومدى الىپ، ونى جىرتىپ جىبەرگەنى كورىنەدى. بۇل ارەكەت جەلى قولدانۋشىلارىنىڭ نارازىلىعىن تۋدىرىپ، كوپشىلىك ونى بىلىمگە، وقۋ ورنى مەن وقىتۋشىلارعا دەگەن قۇرمەتسىزدىك دەپ باعالادى.
الايدا كەيىنىرەك بۇل الدىن الا جوسپارلانعان قويىلىم ەكەنى انىقتالدى: كوللەدج ستۋدەنتى مەملەكەتتىك ديپلومنىڭ ءتۇپنۇسقاسىن ەمەس، ارنايى دايىندالعان كوشىرمەسىن جىرتقان. سوعان قاراماستان، الماتىداعى حالىقارالىق بيزنەس جانە كوممۋنيكاسيالار كوللەدجىنىڭ (ICB) ستۋدەنتى داۋلەت ايدوس ۇلى كوپشىلىك الدىندا كەشىرىم سۇرادى.
«مەن، ابدراحمان داۋلەت ايدوس ۇلى، حالىقارالىق بيزنەس جانە كوممۋنيكاسيالار كوللەدجىنىڭ (ICB) ستۋدەنتىمىن. الەۋمەتتىك جەلىلەردە تارالعان ديپلوم تاپسىرۋ راسىمىندەگى بەينەجازباعا بايلانىستى كوللەدج ۇجىمىنان، وقىتۋشىلاردان، ءبىلىم باسقارماسىنان جانە بارشا جۇرتشىلىقتان شىن جۇرەكتەن كەشىرىم سۇرايمىن. مەن شىن ديپلومىمدى جىرتقان جوقپىن. ۆيدەو ءۇشىن الدىن الا دايىندالعان ديپلومنىڭ كوشىرمەسىن پايدالاندىم. مەنىڭ ارەكەتىمدە ەشقانداي جامان نيەت نەمەسە كوللەدجگە جانە ونىڭ قۇندىلىقتارىنا قۇرمەتسىزدىك كورسەتۋ ماقساتى بولعان جوق. بولعان جاعدايعا شىن جۇرەكتەن وكىنەمىن جانە مۇنداي جاعدايدىڭ ەندى قايتالانبايتىنىنا ۋادە بەرەمىن»، – دەدى ستۋدەنت.
ايتا كەتەيىك، كەڭ تاراعان ۆيدەو سىن تۋدىرىپ، ديپلوم تاپسىرۋ سالتاناتىنىڭ ءمانى مەن ونى وقۋ ورىندارىندا قۇرمەتتەۋ ماسەلەسىن تاعى دا كوتەردى.