الماتىدا ستۋدەنتتەردى جاتاقحانامەن قامتاماسىز ەتۋ جونىندەگى سيتۋاسيالىق ورتالىق جۇمىسىن باستادى. ونىڭ اشىلۋى عىلىم جانە جوعارى ءبىلىم مينيسترلىگى مەن قالا اكىمدىگىنىڭ بىرلەسكەن باستاماسىنىڭ ارقاسىندا مۇمكىن بولدى، دەپ حابارلايدى infohub.kz سايتى.
ورتالىق قازاق ۇلتتىق قىزدار پەداگوگيكالىق ۋنيۆەرسيتەتىنىڭ (QyzPU) بازاسىندا بوگەنباي باتىر كوشەسى، 142 مەكەنجايى بويىنشا ورنالاسقان.
«جوعارى وقۋ ورىندارىنىڭ سيفرلىق پلاتفورمالارى ارقىلى جاتاقحانادان ورىن برونداپ ۇلگەرمەگەن نەمەسە ورنالاسۋ پروسەسىندە قيىندىقتارعا تاپ بولعان ءبىلىم الۋشىلار سيتۋاسيالىق ورتالىققا تىكەلەي جۇگىنە الادى»، — دەپ اتاپ ءوتتى عىلىم جانە جوعارى ءبىلىم مينيسترلىگىندە.
ورتالىق ماماندارى ستۋدەنتتەردىڭ وتىنىشتەرىن قاراپ، بوس ورىندار بولعان جاعدايدا جاتاقحانالاردا نەمەسە سەرىكتەس ۇيىمداردا ۋاقىتشا تۇرۋ نۇسقالارىن ىرىكتەيدى.
وتىنىشتەرمەن ءتيىمدى جۇمىس ىستەۋ ءۇشىن ورتالىقتا كومپيۋتەرلەرمەن، سيفرلىق بازالارعا قولجەتىمدىلىكپەن جانە ءبىر ۋاقىتتا 10 قوڭىراۋعا دەيىن قابىلداۋعا مۇمكىندىك بەرەتىن كوپ ارنالى بايلانىس جۇيەسىمەن جابدىقتالعان سەگىز جۇمىس ورنى بار.
سونىمەن قاتار، ورتالىقتا كۇتۋ جانە دەمالىس ايماعى، وقۋ بۇرىشى، كوفە-برەيك ايماعى جانە كونفەرەنس-زال قاراستىرىلعان.
بۇعان دەيىن پرەمەر-مينيستر ولجاس بەكتەنوۆ قازاقستانداعى ستۋدەنتتىك جاتاقحانالارداعى ورىن تاپشىلىعى قازىرگى ۋاقىتتا شامامەن 10 مىڭدى قۇرايتىنىن، بۇرىن بولجانعانداي 33 مىڭ ەمەس ەكەنىن حابارلاعان بولاتىن.
كەشە بلوگەر نۇرسۇلتان قامسەبايەۆ الەۋمەتتىك جەلىلەردە استاناداعى جاڭا قازاق ۇلتتىق سپورت ۋنيۆەرسيتەتىنىڭ (قۇسۋ) ستۋدەنتتەرى قانداي جاعدايدا تۇراتىنىن كورسەتتى. جاتاقحانالاردا ءار بولمەدە جەكە سانيتارلىق توراپ پەن دۋش بار، ال تۇرۋ قۇنى ايىنا 30 مىڭ تەڭگەنى قۇرايدى.