الماتىدا سۋمەن جابدىقتاۋ جانە سۋ بۇرۋ تاريفتەرىنىڭ وسۋىنە ەلەكتر ەنەرگياسىنىڭ قىمباتتاۋى، ەڭبەكاقى شىعىندارىنىڭ ارتۋى جانە جەلىلەردىڭ توزۋى سەبەپ بولدى. بۇل تۋرالى «الماتى سۋ» باس ديرەكتورىنىڭ ورىنباسارى جاندوس تاكيبايەۆ مالىمدەدى، دەپ حابارلايدى infohub.kz سايتى.
ەسكە سالايىق، 2026 جىلعى 1 قازاننان باستاپ الماتى تۇرعىندارى سۋىق سۋ ءۇشىن تەكشە مەترىنە 178،06 تەڭگە، ال سۋ بۇرۋ ءۇشىن 119،46 تەڭگە تولەيدى.
تاكيباەۆتىڭ ايتۋىنشا، سۋمەن جابدىقتاۋ مەن سۋ بۇرۋ ەنەرگيانى كوپ قاجەت ەتەتىن پروسەستەر، سوندىقتان ەلەكتر ەنەرگياسى قۇنىنىڭ وزگەرۋى قىزمەتتىڭ وزىندىك قۇنىنىڭ وسۋىنە اكەلەدى. سونداي-اق رەاگەنتتەر، ماتەريالدار، قوسالقى بولشەكتەر، جابدىقتار جانە نىسانداردى پايدالانۋعا قاجەتتى باسقا دا رەسۋرستارعا جۇمسالاتىن شىعىندار ءوستى.
«ەكىنشى ماڭىزدى فاكتور — قىزمەتكەرلەردىڭ جالاقى دەڭگەيىن رەتتەۋ. ەڭبەكاقى تولەۋ شىعىندارى قىزمەتتەردىڭ وندىرىستىك وزىندىك قۇنىنىڭ بولىگى بولعاندىقتان، ەڭبەكاقى قورىنىڭ تۇزەتىلۋى تاريفتە ەسكەرىلەدى»، — دەدى ول.
تاريفتەردىڭ ءوسۋىنىڭ تاعى ءبىر سەبەبى — پايدالانۋداعى كوممۋنالدىق ينفراقۇرىلىم كولەمىنىڭ ايتارلىقتاي ۇلعايۋى. ماسەلەن، سوڭعى ەكى جىلدا جالپى قۇنى 73،2 ملرد تەڭگە بولاتىن نىساندار ىسكە قوسىلدى: 32 كارىز سورعى ستانسياسى، 6 سورعى ستانسياسى، 9 تازا سۋ رەزەرۆۋارى، 18 ۇڭعىما، 385 كم سۋ قۇبىرى جەلىلەرى جانە 374 كم كارىز جەلىلەرى.
«ءاربىر ىسكە قوسىلعان نىسان ەلەكتر ەنەرگياسىنا، تەحنيكالىق قىزمەت كورسەتۋگە، جوندەۋگە، ماتەريالدارعا، پەرسونالعا جانە اپاتتىق دەن قويۋعا تۇراقتى شىعىنداردى تالاپ ەتەدى»، — دەپ قوستى «الماتى سۋ» ديرەكتورىنىڭ ورىنباسارى.
ءتورتىنشى فاكتور — ينۆەستيسيالىق مىندەتتەمەلەر جانە ينفراقۇرىلىمدى جاڭارتۋ قاجەتتىلىگى. جەلىلەر مەن جابدىقتار فيزيكالىق تۇرعىدان توزادى، سونىمەن قاتار الماتىنىڭ دامۋىمەن بىرگە سۋمەن جابدىقتاۋ جانە سۋ بۇرۋ جۇيەسىنە جۇكتەمە ارتىپ كەلەدى. سوندىقتان قولدانىستاعى ينفراقۇرىلىمدى ۇستاپ تۇرۋ عانا ەمەس، ونى ۋاقتىلى قايتا جاڭارتۋ جانە مودەرنيزاسيالاۋ، جەلىلەردىڭ وتكىزۋ قابىلەتىن ارتتىرۋ جانە جاڭا نىسانداردى قوسۋعا مۇمكىندىك جاساۋ قاجەت.
«بۇگىندە ۇستاۋعا قاجەت ينفراقۇرىلىم كولەمى وزگەردى، پايدالانۋ شىعىندارى ءوستى، جۇيەگە جۇكتەمە ارتتى جانە قوسىمشا ينۆەستيسيالار قاجەتتىلىگى تۋىندادى»، — دەپ اتاپ ءوتتى تاكيبايەۆ.
«الماتى سۋ» ءتاريفتىڭ ءوسۋى ەسەبىنەن الىنعان قاراجاتتىڭ بارلىعى جەلىلەردى جوندەۋگە جانە جابدىقتاردى جاڭارتۋعا جۇمسالاتىنىن ۋادە ەتتى.
بۇعان دەيىن «كۋرسيۆ» 2026 جىلعى 12 قىركۇيەكتەن باستاپ «الاتاۋ جارىق كومپانياسى» ەلەكتر ەنەرگياسىن بولشەك ساۋدادا وتكىزۋدىڭ شەكتى باعاسىن 1 كۆتساع ءۇشىن 45،59 تەڭگەگە دەيىن كوتەرگەنىن جازعان بولاتىن.