18 شىلدە، سەنبى كۇنى الماتىدا جازعى كەشكى Summer Relay ەستافەتاسىنا بايلانىستى تاريحي ورتالىقتاعى بىرنەشە كوشەدە كولىك قوزعالىسى ۋاقىتشا شەكتەلەدى، دەپ حابارلايدى infohub.kz سايتى.
قالا اكىمدىگىنىڭ مالىمەتىنشە، بيىل جۇگىرۋ مارشرۋتى العاش رەت تاريحي ورتالىق ارقىلى وتەدى. ەستافەتا تولە بي، قابانباي باتىر، پانفيلوۆ كوشەلەرى مەن ابىلاي حان داڭعىلىندا ۇيىمداستىرىلادى.
ەڭ ۇزاق شەكتەۋ تولە بي كوشەسىنىڭ پانفيلوۆ كوشەسىنەن ابىلاي حان داڭعىلىنا دەيىنگى بولىگىندە بولادى. بۇل ۋچاسكەدە قوزعالىس 18 شىلدە ساعات 09:00-دەن 19 شىلدە ساعات 06:00-گە دەيىن جابىلادى.
قالعان شەكتەۋلەر 18 شىلدەدە ساعات 20:00-دەن 23:00-كە دەيىن ەنگىزىلەدى. بۇل ۋاقىتتا مىنا كوشەلەر جابىلادى: ابىلاي حان داڭعىلى – تولە بي كوشەسىنەن قابانباي باتىر كوشەسىنە دەيىن؛ قابانباي باتىر كوشەسى – ابىلاي حان داڭعىلىنان نازاربايەۆ داڭعىلىنا دەيىن؛ پانفيلوۆ كوشەسى – قابانباي باتىر كوشەسىنەن تولە بي كوشەسىنە دەيىن.
جارىس باعدارلاماسى 18:00-دە بالالاردىڭ 500، 1000 جانە 2000 مەتر قاشىقتىققا جۇگىرۋىمەن باستالادى. ساعات 20:00-دە 2 شاقىرىمدىق جاپپاي جۇگىرۋ، ال 21:00-دە كوماندالىق Summer Relay ەستافەتاسى وتەدى. بەس ادامنان تۇراتىن كوماندالار 10 شاقىرىم قاشىقتىقتى ەڭسەرەدى.
ۇيىمداستىرۋشىلار قالا تۇرعىندارى مەن قوناقتارىنا مارشرۋتتى الدىن الا جوسپارلاپ، قوزعالىس سحەماسىنداعى ۋاقىتشا وزگەرىستەردى ەسكەرۋدى ۇسىنادى.