2026 جىلدىڭ ءبىرىنشى جارتىجىلدىعىندا الماتىدا پروفيلاكتيكالىق تەكسەرۋلەر قورىتىندىسى بويىنشا 200-دەن استام ايەلدە ءسۇت بەزى قاتەرلى ىسىگى انىقتالدى. جالپى وسى كەزەڭدە 250-دەن استام ونكولوگيالىق اۋرۋ تىركەلدى. بۇل دەرەكتەر قالالىق قوعامدىق دەنساۋلىق ساقتاۋ باسقارماسىنىڭ كەڭەسىندە جاريالاندى، دەپ حابارلايدى infohub.kz سايتى.
«جىلدىڭ العاشقى التى ايىندا الماتىدا سكرينينگتىك زەرتتەۋلەر ناتيجەسى بويىنشا 200-دەن استام ءسۇت بەزى قاتەرلى ىسىگى جانە 58 كولورەكتالدى ىسىك انىقتالدى»، — دەلىنگەن حابارلامادا. بارلىق پاسيەنت ديسپانسەرلىك باقىلاۋعا الىنعانى اتاپ ءوتىلدى.
كولورەكتالدى ىسىككە سكرينينگتەن 108 مىڭنان استام تۇرعىن ءوتتى. ونىڭ قورىتىندىسى بويىنشا 803 ءتۇرلى پاتولوگيا انىقتالدى، ونىڭ ىشىندە توق جانە تىك ىشەكتىڭ 745 قاتەرسىز جانە 58 قاتەرلى ىسىگى بار.
كەڭەس قورىتىندىسى بويىنشا مەديسينالىق ۇيىمدارعا سكرينينگ ناتيجەسى وڭ بولعان پاسيەنتتەرگە تەكسەرۋدىڭ ەكىنشى كەزەڭىن وتكىزۋ تاپسىرىلدى. ول «جاسىل ءدالىز» قاعيداتى بويىنشا 3–5 جۇمىس كۇنى ىشىندە ءجۇرۋى ءتيىس.
سونداي-اق ونكولوگيالىق اۋرۋلاردى انىقتاۋ كورسەتكىشى نولگە تەڭ مەديسينالىق ۇيىمدارعا اپتا سايىنعى مونيتورينگ جانە العاشقى مەديسينالىق-سانيتارلىق كومەك ۇيىمدارىنىڭ جۇمىسىنا اي سايىنعى تالداۋ ۇيىمداستىرۋ جوسپارلانۋدا.
سونىمەن قاتار، سكرينينگتىك زەرتتەۋلەردىڭ ساپاسىن ارتتىرۋعا ەرەكشە كوڭىل بولىنبەك. جەكە كلينيكالاردا سىرتقى اۋديت جۇرگىزىلەدى، ال جۇمىس ىستەيتىن تۇرعىندار ءۇشىن كەشكى ۋاقىتتا جانە سەنبى كۇندەرى سكرينينگتەن وتۋگە ارنالعان جەكە ساعاتتار ۇيىمداستىرۋ جوسپارلانۋدا.
بۇعان دەيىن قازاقستاندا ونكولوگياعا كۇدىكتى پاسيەنتتەرگە كەزەكسىز تەكسەرىلۋگە مۇمكىندىك بەرەتىن «جاسىل ءدالىز» جۇيەسى ەنگىزىلگەنى حابارلانعان بولاتىن.