الماتىدا «ءسۇت بەزى قاتەرلى ىسىگى» دياگنوزىمەن 20-عا جۋىق ەر ادام ەسەپتە تۇر. بۇل تۋرالى وڭىرلىك كوممۋنيكاسيالار قىزمەتى الاڭىندا وتكەن بريفينگتە الماتى ونكولوگيالىق ورتالىعىنىڭ وكىلدەرى ايتتى، دەپ حابارلايدى infohub.kz سايتى.
ورتالىق دارىگەرلەرى ەڭ جاس جانە ەڭ ۇلكەن جاستاعى ناۋقاستار جايىندا اڭگىمەلەدى. انىقتالعانى، ءسۇت بەزى قاتەرلى ىسىگى تەك ايەلدەرگە عانا ءتان ەمەس.
«بيىل الماتى ونكولوگيالىق ورتالىعىندا تىركەلگەن ەڭ جاس ناۋقاستىڭ جاسى — 21-دە. مەن سول ناۋقاستى ءوز قولىممەن ەسەپكە الدىم. قازىرگى تاڭدا ول ونكوينستيتۋت جاعدايىندا كەشەندى ەم قابىلداپ جاتىر. ەم ءساتتى ءوتىپ، ناتيجەسىن كورىپ وتىرمىز. ال قاتەرلى ىسىك جىل سايىن جاسارىپ بارادى»، — دەپ ءتۇسىندىردى الماتى ونكولوگيالىق ورتالىعىنىڭ ونكولوگ-ماممولوگ دارىگەرى بالزيا قالىمبەتوۆا.
ال ەڭ ۇلكەن جاستاعى ناۋقاس — ءسۇت بەزى قاتەرلى ىسىگىمەن اۋىرعان 93 جاستاعى ايەل.
«نەگىزىنەن، ءسۇت بەزى قاتەرلى ىسىگىنىڭ جاس شەكتەۋى جوق. ەر ادامداردا دا ءسۇت بەزى قاتەرلى ىسىگى دامۋى مۇمكىن. الماتى ونكولوگيالىق ورتالىعىندا 20-عا جۋىق ەر ادام ەسەپتە تۇر. ارينە، ەرلەردە سيرەك كەزدەسەدى، ءبىراق سوعان قاراماستان ەرلەر دە ءقاۋىپ توبىندا، وكىنىشكە قاراي»، — دەپ قوستى الماتى ونكوورتالىعىنىڭ كونسۋلتاسيالىق-دياگنوستيكالىق ءبولىمىنىڭ مەڭگەرۋشىسى اقبوتا ءادىلوۆا.
دارىگەرلەردىڭ ايتۋىنشا، بيىلعى سەگىز ايدا ءسۇت بەزى قاتەرلى ىسىگىنىڭ 659 جاعدايى انىقتالعان.
«ونىڭ ىشىندە 5 ايەلدە نولدىك ساتى، 305 ايەلدە ءبىرىنشى ساتى، 312 ناۋقاستا ەكىنشى ساتى، 20 ايەلدە ءۇشىنشى ساتى جانە 17 ناۋقاستا ءتورتىنشى ساتى انىقتالدى. نەگىزىنەن، قاتەرلى ىسىك ەكىنشى ساتىدا انىقتالادى»، — دەدى بالزيا قالىمبەتوۆا.