الماتى تاۋلارىندا 28 قىركۇيەكتە توپتان ءبولىنىپ، جالعىز ءجۇرىپ كەتكەن شەتەلدىك ازاماتتى ىزدەۋ-قۇتقارۋ جۇمىستارى جالعاسىپ جاتىر، دەپ حابارلايدى infohub.kz سايتى.
توتەنشە جاعدايلار مينيسترلىگىنىڭ مالىمەتىنشە، تالعار اسۋى ماڭىندا، شامامەن 3200 مەتر بيىكتىكتە 1953 جىلى تۋعان شەتەلدىك ىزدەستىرىلۋدە. ول 28 قىركۇيەكتە توپ قۇرامىندا «شىمبۇلاق» كانات جولىمەن كوتەرىلگەن.
«وسىدان كەيىن ول ارىپتەستەرىنە مارشرۋتتى جالعىز جالعاستىرىپ، قالاعا سۇيەمەلدەۋسىز تۇسەتىنىن ايتقان. الايدا قوناقۇيگە ورالماعان. 29 قىركۇيەكتە ونىڭ جوعالعانى تۋرالى اقپارات "112" پۋلتىنە ءتۇستى. سول كۇنى تجم دەرەۋ ىزدەۋ-قۇتقارۋ جۇمىستارىن ۇيىمداستىردى. الماتى قالاسى تجد جەدەل شتابى ورنالاستىرىلدى»، — دەلىنگەن ۆەدومستۆو حابارلاماسىندا.
قيىن جەتەتىن ۋچاسكەلەردى تەكسەرۋگە تجم كۇشتەرى مەن قۇرالدارى، الماتى قالاسىنىڭ مونيتورينگ جانە جەدەل دەن قويۋ ورتالىعى، كينولوگيالىق ەسەپتەر، تجم «بارىس» رەسپۋبليكالىق قۇتقارۋ قىزمەتىنىڭ قۇتقارۋشىلارى، پوليسيا دەپارتامەنتىنىڭ قىزمەتكەرلەرى، «دسس» ەرىكتىلەرى جۇمىلدىرىلدى. بارلىعى 50-گە جۋىق ادام، 8 تەحنيكا بىرلىگى، 7 ۇشقىشسىز ۇشۋ اپپاراتى، 3 كينولوگيالىق ەسەپ جانە «قازاۆياسپاس» تىكۇشاعى تارتىلدى.
«قازاۆياسپاس» تىكۇشاعىنىڭ ەكيپاجى سولتۇستىك تالعار، بوگدانوۆيچ مۇزدىعى جانە وعان ىرگەلەس شاتقالدارداعى شىڭدار مەن اسۋلارعا قاراي تاۋ مارشرۋتتارىن تەكسەردى. سونداي-اق 7 ۇشقىشسىز ۇشۋ اپپاراتىن پايدالانىپ، جاياۋ ىزدەۋ توپتارى قيىن جەتەتىن ۋچاسكەلەر مەن تاۋ سوقپاقتارىن تەكسەرەدى، بەينەباقىلاۋ كامەرالارىنىڭ جازبالارىن قاراۋ جانە ىزدەۋ جۇمىستارى جۇرگىزىلگەن اۋداندا بولعان تۋريستەردەن سۇراۋ جالعاسۋدا.
«ىزدەۋ-قۇتقارۋ جۇمىستارى تاۋلىك بويى جالعاسىپ جاتىر. قۇتقارۋشىلار كۇردەلى رەلەفتى، بيىكتىكتى جانە جەكەلەگەن ۋچاسكەلەردىڭ قيىن جەتەتىنىن ەسكەرە وتىرىپ، تاۋلى جەردى تەكسەرەدى»، — دەپ سەندىردى تجم.