كەشە تۇندە الماتى تاۋلارىندا قۇتقارۋشىلار اداسىپ قالعان جىگىت پەن قىزدى تاپتى. ىزدەۋ-قۇتقارۋ جۇمىستارى 2600 مەتر بيىكتىكتە جۇرگىزىلدى، دەپ حابارلايدى infohub.kz سايتى.
جاستار الماتى وبلىسىنىڭ قاراساي اۋدانىنداعى «تەررا» الاڭى ماڭىندا اداسىپ قالعان. جىگىت «112» نومىرىنە قوڭىراۋ شالىپ، سەرىكتەسىمەن بىرگە جولدان اداسقانىن ايتقان. تەلەفونىنىڭ زاريادى تاۋسىلىپ، كوپ ۇزاماي بايلانىس ۇزىلگەن.
ىزدەۋگە الماتى قالالىق مونيتورينگ جانە جەدەل رەاگيروۆانيە ورتالىعىنىڭ قۇتقارۋشىلارى دەرەۋ شىققان. ناتيجەسىندە 2006 جىلى تۋعان جىگىت پەن 2005 جىلى تۋعان قىز تابىلدى. قۇتقارۋشىلار ولاردى «الما-اراسان» تۇراعىنا دەيىن جەتكىزدى. ولارعا مەديسينالىق كومەك قاجەت بولمادى، ولار ۇيلەرىنە وزدىگىنەن كەتتى.
تجم قاۋىپسىزدىك ەرەجەلەرىن ەسكە سالدى: «تاۋعا شىعار الدىندا جاقىندارىڭىزعا مارشرۋتىڭىزدى الدىن الا حابارلاڭىز، اۋا رايى بولجامىن تەكسەرىڭىز، تولىق زاريادتالعان تەلەفون جانە سىرتقى اككۋمۋلياتور الىڭىز. تاۋعا جالعىز شىقپاڭىز جانە ءقاۋىپسىز مارشرۋتتاردان اۋىتقىماڭىز».