الماتى تاۋلارىندا قاتتى قۇلاما بولدى: ۇلكەن الماتى كولىنىڭ ماڭىندا 2500 مەتر بيىكتىكتەن كولەمى اۆتوكولىكتەي تاستار قۇلادى، دەپ حابارلايدى infohub.kz سايتى.
وقيعانىڭ كۋاگەرى بولعان تۋريستەر بەينەجازبانى ءتۇسىرىپ، الەۋمەتتىك جەلىگە جاريالادى. ولاردىڭ ايتۋىنشا، اشىق اۋا رايىنا قاراماستان، تاۋدان كەنەتتەن تاستار قۇلاي باستاعان، سودان كەيىن اينالانى قالىڭ شاڭ باسقان. كۋاگەرلەر ءقاۋىپسىز قاشىقتىقتا بولعاندىقتان، ەشكىم زارداپ شەكپەگەنىن اتاپ ءوتتى.
الەۋمەتتىك جەلىدەگى پىكىر بىلدىرۋشىلەر بۇل — تابيعاتتىڭ ەسكەرتۋى دەپ، قۇرىلىستى توقتاتىپ، تابيعاتتى قورعاۋعا شاقىرۋدا.
توتەنشە جاعدايلار دەپارتامەنتى اقپاراتتى راستادى. ولاردىڭ مالىمەتىنشە، №12 قار كوشكىنى جيناعىش ايماعىندا تاۋ بەتكەيىنىڭ جارتاستى بولىگىنەن تاس قۇلاعان. قۇلامانىڭ سەبەپتەرى — تاۋ جىنىستارىنىڭ تابيعي ۇگىلۋى، تەمپەراتۋرانىڭ وزگەرۋى جانە اتموسفەرالىق جاۋىن-شاشىننىڭ اسەرى.
قۇلاعان تاستار جولعا جەتكەن جوق. قازا تاپقاندار مەن زارداپ شەككەندەر جوق، ەشقانداي قيراۋ تىركەلمەگەن.
بۇعان دەيىن نەپال مەن تيبەت شەكاراسىنداعى جويقىن تابيعي اپات تۋرالى حابارلانعان بولاتىن. 26 تامىزدا نەپالدا مۇزدىق قۇلاپ، سالدارىنان جۇزدەگەن ادامنىڭ ءومىرىن قيعان قاتتى سۋ تاسقىنى بولدى. جىل سايىن مىڭداعان زياراتشىلار رۋحاني ىزدەنىس پەن وي تۇيىندەۋ ءۇشىن باراتىن ايماق ءبىر ساتتە اپات ايماعىنا اينالدى.
كەيىنىرەك سىرتقى ىستەر مينيسترلىگى نەپال مەن جۇڭگو شەكاراسىندا قازاقستاندىق ءتۋريستى ىزدەپ جاتقانى بەلگىلى بولدى. الدىن الا مالىمەت بويىنشا، ايەل تۋريستىك توپ قۇرامىندا بولعان جانە توپپەن بىرگە نەپالدان جۇڭگو اۋماعىنا وتكەن.