الماتىدا كوممۋنالدىق اقىلى تۇراقتاردىڭ تاريفتەرىن قايتا قاراۋ ۇسىنىلىپ وتىر: ءقازىر تۇراق ساعاتى ورنىنا قاراماستان 100 تەڭگە تۇرادى، الايدا قالا ءبىرىڭعاي مولشەرلەمەدەن باس تارتپاق، دەپ حابارلايدى infohub.kz سايتى.
قالالىق اكىمدىكتىڭ ءباسپاسوز قىزمەتىنىڭ مالىمەتىنشە، قولدانىستاعى تاريف 2016 جىلدان بەرى كۇشىندە. وسى ۋاقىت ىشىندە مەگاپوليستەگى كولىك سانى ميلليوننان اسىپ كەتتى، سونىڭ سالدارىنان جولداردا جانە تۇراقتاردىڭ جانىندا ءجيى رەتسىزدىك تۋىندايدى: جۇرگىزۋشىلەر بوس ورىن ىزدەپ ورتالىقتى ساعاتتاپ اينالىپ جۇرەدى، كەپتەلىس جاسايدى جانە كولىكتەرىن ەكىنشى قاتارعا قالدىرادى.
ەندى تۇراق قۇنىن كوشەلەردىڭ جۇكتەمەسىنە بايلانىستىرۋ ۇسىنىلىپ وتىر. جوبا الماتى ءماسليحاتىنىڭ سەسسياسىندا تانىستىرىلدى:
ساعاتىنا 100 تەڭگە — كولىك از جەرلەردە؛
ساعاتىنا 150 تەڭگە — ورتاشا جۇكتەمەسى بار ايماقتاردا؛
ساعاتىنا 200 تەڭگە — سۇرانىسى جوعارى ەڭ تانىمال ورىنداردا (مىسالى، ءىرى ساۋدا ورتالىقتارىنىڭ جانىندا).
مۇنداي ءتاسىل الەمنىڭ باسقا دا قالالارىندا قولدانىلادى. ماسكەۋدە تۇراق قۇنى ناقتى كوشەنىڭ جۇكتەمەسىنە بايلانىستى. ورتالىق اۋدانداردا تاريفتەر ساعاتىنا 600 رۋبلگە (شامامەن 3200 تەڭگە) جەتەدى، ال كەيبىر ۋچاسكەلەردە ديناميكالىق باعا ساعاتىنا 800 رۋبلگە (شامامەن 4300 تەڭگە) دەيىن بارادى.
ەۋروپا قالالارىندا دا تۇراق قۇنىن سارالاۋ كەڭ تارالعان. مىسالى، امستەردام ورتالىعىندا تۇراق ساعاتى ورتا ەسەپپەن 4،22 ەۋرو (شامامەن 2200 تەڭگە)، ال كەيبىر ورتالىق كوشەلەردە 7،50 ەۋرو (شامامەن 3900 تەڭگە) تۇرادى. ەۋروپالىق كولىك قاۋىمداستىعىنىڭ زەرتتەۋى تۇراق قۇنىن ارتتىرۋ كوشەدەگى تۇراق ورىندارىنا سۇرانىستى جانە اۆتوموبيلمەن ءجۇرىپ-تۇرۋ سانىن ازايتۋى مۇمكىن ەكەنىن كورسەتتى.
الەمدىك تاجىريبەمەن سالىستىرعاندا، ءبىزدىڭ ساعاتىنا 200 تەڭگەمىز وتە قاراپايىم.
سونىمەن قاتار الماتىدا اقىلى تۇراقتاردىڭ جانىنداعى ۇيلەردىڭ تۇرعىندارى ءۇشىن جەڭىلدىكتەر ساقتالادى. ولار ارنايى رۇقسات راسىمدەپ، ءۇيىنىڭ جانىنداعى تۇراق ورىندارىن تەگىن پايدالانا الادى.
جوبا اۆتورلارىنىڭ پىكىرىنشە، جاڭا جۇيە ەڭ جۇكتەمەسى جوعارى اۋداندارداعى تۇراق ورىندارىن بوساتۋعا مۇمكىندىك بەرەدى. سونىمەن قاتار قالا ەڭ سۇرانىسقا يە تۇراقتاردان كوبىرەك تابىس الا الادى.
بۇعان دەيىن Kursiv LifeStyle الماتى ءماسليحاتىنىڭ دەپۋتاتتارى مەدەۋ مەن شىمبۇلاققا اۆتوموبيلدەردىڭ كىرۋىنىڭ جاڭا ەرەجەلەرى جوباسىن قولداعانىن جازعان بولاتىن. جوبانى الماتى ەكولوگيا جانە قورشاعان ورتانى قورعاۋ باسقارماسى باسشىسىنىڭ ورىنباسارى ارشات باقتىگەرەيەۆ تانىستىردى.