2022 جىلعى قاڭتار وقيعاسىنان ءتورت جىل وتسە دە، قازاقستاندا سول كەزدە ۇرلانعان قارۋ ءالى دە تابىلىپ جاتىر. تەك قىركۇيەك ايىندا پوليسيا توعىز بىرلىك قارۋ تاركىلەدى، ال 2026 جىلدىڭ باسىنان بەرى زاڭسىز اينالىمنان 1700-دەن استام قارۋ الىندى، دەپ حابارلايدى infohub.kz سايتى.
تامىزدا پوليسەيلەر الماتى مەن وسكەمەندە 2022 جىلدىڭ قاڭتارىندا الماتىداعى قارۋ دۇكەندەرىنەن ۇرلانعان ءۇش بىرلىك قارۋدى تاپتى. ول الماتى وبلىسىنىڭ ەكى تۇرعىنىنان تاركىلەندى.
قىركۇيەكتىڭ باسىندا تارازدا جەرگىلىكتى تۇرعىن ۇستالدى. ونىڭ ۇيىندە جامبىل وبلىسىنداعى قاڭتار وقيعاسى كەزىندە ۇرلانعان ماكاروۆ تاپانشاسى ساقتالعان. كۇدىكتىلەر قاماۋعا الىندى، تەرگەۋ جالعاسۋدا.
2026 جىلدىڭ باسىنان بەرى پوليسيا زاڭسىز اينالىمنان 1700-دەن استام قارۋ تاركىلەدى، ونىڭ ىشىندە 34 اۆتومات، 458 تاپانشا، مىڭنان استام مىلتىق جانە ءۇش گراناتومەت بار. سونداي-اق قۇقىق قورعاۋشىلار شامامەن 12 مىڭ ءوق-دارى تاركىلەدى. بۇل ستاتيستيكاعا 2022 جىلدىڭ قاڭتارىندا ۇرلانعان 152 بىرلىك قارۋ دا كىرەدى.
ىشكى ىستەر مينيسترلىگى قارۋدى ەرىكتى تۇردە تاپسىرۋ اكسياسىن بولەك وتكىزۋدە. 20 ساۋىردەن باستاپ ەل تۇرعىندارى 900-دەن استام قارۋ مەن التى مىڭعا جۋىق ءوق-دارى تاپسىردى.
«زاڭسىز ساقتالعان قارۋدى ەرىكتى تۇردە تاپسىرعان ادامدار زاڭدا بەلگىلەنگەن تارتىپپەن قىلمىستىق جانە اكىمشىلىك جاۋاپكەرشىلىكتەن بوساتىلادى»، — دەپ حابارلادى ءىىم.
ۆەدومستۆو قارۋدىڭ زاڭسىز ساقتالعان جەرلەرى تۋرالى پوليسياعا 102 ءنومىرى ارقىلى نەمەسە eOtinish سەرۆيسى ارقىلى حابارلاۋعا بولاتىنىن ەسكە سالدى. ءىىم انونيمدىلىككە كەپىلدىك بەرەدى.
بۇعان دەيىن «كۋرسيۆ» قاڭتار كەزىندە جوعالعان وق-دارىلەرى بار جاسىرىن قويمانىڭ كۇتپەگەن جەردەن تابىلعانىن جازعان بولاتىن: قويما تاسجولدىڭ بويىنداعى ارىقتا ورنالاسقان.