الماتى-1 تەمىرجول ۆوكزالىندا اۋىر زارداپتارعا اكەلۋى مۇمكىن وقيعا بولدى. ماس كۇيىندەگى ءۇش ەر ادام ءجۇرىپ بارا جاتقان پويىزدىڭ باسپالداعىنا سەكىرمەك بولىپ، ماشينيست كابيناسىنا بوگدە زاتتار لاقتىرعان. سالدارىنان ماشينيست اۆاريالىق تەجەگىش قولدانۋعا ءماجبۇر بولدى، دەپ حابارلايدى infohub.kz.
ق ر ءىىم كولىكتەگى پوليسيا دەپارتامەنتىندەگىلەردىڭ ايتۋىنشا، وقيعا الماتى-1 ستانسياسىندا بولعان. قۇقىق قورعاۋ ورگاندارى تەمىرجول كولىگىندە ءجۇرىس-تۇرىس ەرەجەسىن ورەسكەل بۇزىپ، پويىز قوزعالىسىنا ناقتى ءقاۋىپ توندىرگەن ءۇش ازاماتتى ۇستادى.
بۇزۋشىلاردىڭ جەكە باسى انىقتالدى — ولار جامبىل جانە الماتى وبلىستارىنىڭ 32 بەن 35 جاس ارالىعىنداعى تۇرعىندارى بولىپ شىقتى. الماتى — اتىراۋ باعىتىنداعى جولاۋشىلار پويىزى جونەلگەن ساتتە ولار لوكوموتيۆتىڭ باسپالداعىنا سەكىرمەك بولىپ، تۇتقادان ۇستاعان. بۇل كەزدە ولار ماشينيست كابيناسىنا بوگدە زاتتار لاقتىرا باستاعان.
ادامداردىڭ قاۋىپسىزدىگىنە تونگەن قاۋىپكە بايلانىستى ماشينيست اۆاريالىق تەجەگىش قولدانعان. پويىزدىڭ جوسپاردان تىس توقتاۋى ەكى مينۋتقا سوزىلدى.
ۇستالعاندارعا قاتىستى اكىمشىلىك ءىس قوزعالدى. نەگىز رەتىندە قوعامدىق ورىنداردا الكوگولدىك ىشىمدىك ءىشۋ نەمەسە ماس كۇيىندە ءجۇرۋ، سونداي-اق تەمىرجول كولىگى نىساندارىندا ءجۇرىس-تۇرىس ەرەجەسىن بۇزۋ الىندى.