27-نەن 28-ىنە قاراعان ءتۇنى Almaty Museum of Arts (ALMA) مۇراجايىنىڭ قاسبەتى ءتۇرلى-تۇستى شەڭبەرلەردەن تۇراتىن پۋلستىك كەنەپكە اينالدى — الماتىدا جاپوندىق اتى اڭىزعا اينالعان سۋرەتشى ءياوي كۋسامانى وسىلاي ەسكە الدى، دەپ حابارلايدى infohub.kz سايتى.
مۇراجايدان تۇسىندىرگەندەي، شەڭبەرلەر — كۋساما شىعارماشىلىعىنداعى ەڭ تانىمال موتيۆتەردىڭ ءبىرى.
ءياوي كۋساما 14 تامىزدا توكيودا 98 جاسىندا قايتىس بولدى. ول قازىرگى زاماننىڭ ەڭ تانىمال سۋرەتشىلەرىنىڭ بىرىنە اينالدى. ونىڭ تۋىندىلارى شەكسىزدىك، كەڭىستىك جانە ونەردى قابىلداۋ تاقىرىپتارىمەن بايلانىستى.
Almaty Museum of Arts — ورتالىق ازيا مەن تمد-داعى كۋسامانىڭ تۋىندىلارى تۇراقتى كوللەكسياعا ەنگەن جالعىز مۇراجاي.
ءقازىر كەلۋشىلەر ونىڭ 2013 جىلى جاسالعان LOVE IS CALLING ينستاللياسياسىن كورە الادى. ول ايگىلى Infinity Mirror Rooms سيكلىنە كىرەدى. كەڭىستىك ىشىندە نۇكتەلى جارقىراعان پىشىندەر بار، ال سۋرەتشىنىڭ داۋىسى ماحاببات، ماڭگىلىك جانە ادام ءومىرى تۋرالى ولەڭ وقيدى.
2027 جىلى مۇراجاي كوللەكسياسىندا كۋسامانىڭ تاعى ءبىر تۋىندىسى پايدا بولادى — 2023 جىلعى Aspiring to Pumpkin’s Love، the Love in My Heart قولا ءمۇسىنى. ول سۋرەتشىنىڭ ەڭ تانىمال بەينەلەرىنىڭ ءبىرى — اسقاباققا ارنالعان.
ALMA-دا قاسبەتتەگى جارىق پروەكسياسى كۋسامانىڭ تۋىندىلارىن كوشىرمەيتىنىن اتاپ ءوتتى. ول سۋرەتشىنى ەسكە الۋ ءۇشىن، ونىڭ شىعارماشىلىعى مەن شەكسىزدىك تاقىرىبىنان شابىتتانىپ، ارنايى جاسالعان.
«ءياوي كۋساما الەمگە قاراپايىم فورمالاردا شەكسىزدىكتى كورۋدى، ال ونەردەن ەم تابۋدى ۇيرەتتى. ونىڭ شىعارماشىلىعىن ءبىزدىڭ ايماقتا ۇسىناتىن ينستيتۋت بولۋ — ۇلكەن ارتىقشىلىق پەن جاۋاپكەرشىلىك»، — دەدى ALMA كوممۋنيكاسيالار جونىندەگى جەتەكشىسى گاۋھار ساتپاەۆا.
ونىڭ ايتۋىنشا، جارىق پروەكسياسى تۋىندىلارى مەن داۋىسى مۇراجايدا ءومىر ءسۇرۋىن جالعاستىرىپ جاتقان سۋرەتشىگە قۇرمەت بەلگىسى بولدى.