الماتىدا قالا اكىمى دارحان ساتىبالدىنىڭ تاپسىرماسىمەن زاڭسىز قۇرىلىسقا، سونىڭ ىشىندە ماقساتتى جەر ساناتى جەكە تۇرعىن ءۇي قۇرىلىسىن كوزدەمەيتىن — باقشا نەمەسە جەكە قوسالقى شارۋاشىلىق ۋچاسكەلەرىندە تۇرعىن ءۇي سالۋعا قاتاڭ باقىلاۋ كۇشەيتىلدى. بۇل تۋرالى infohub.kz سايتى حابارلايدى.
الماتى قالاسى اكىمدىگىنىڭ ءباسپاسوز قىزمەتى مالىمدەگەندەي، باقىلاۋ قۇرىلىس جۇمىستارى باستالعاننان نىساندى پايدالانۋعا قابىلداعانعا دەيىنگى بارلىق كەزەڭدە جۇرگىزىلەدى.
قالالىق قۇرىلىس باقىلاۋ باسقارماسىنىڭ دەرەگىنشە، جىل باسىنان بەرى قالادا 52 زاڭسىز سالىنعان نىسان تولىق نەمەسە ءىشىنارا بۇزىلدى.
باسقارمادا اتاپ وتكەندەي، 2026 جىلعى 1 شىلدەدەن باستاپ قازاقستان رەسپۋبليكاسىنىڭ جاڭا قۇرىلىس كودەكسى كۇشىنە ەنۋىمەن مەملەكەتتىك ساۋلەت-قۇرىلىس باقىلاۋى مەن قاداعالاۋىنا دەگەن كوزقاراس وزگەردى. بۇرىن جەكە تۇرعىن ءۇي قۇرىلىسى جەڭىلدەتىلگەن تارتىپپەن جۇرگىزىلىپ، باسقا نىساندارداعىداي قۇرىلىس باقىلاۋىمەن تولىق قامتىلمايتىن. جاڭا زاڭناما بۇل شارتتاردى وزگەرتتى. قازىرگى تاڭدا زاڭنامادا رۇقسات بەرۋ راسىمدەرىنەن وتۋگە، قۇرىلىستى جوبالاۋعا دەيىنگى جانە جوبالىق دايىندىققا قويىلاتىن تالاپتار جاڭارتىلدى.
بۇل اسىرەسە ماقساتتى جەر ساناتى جەكە تۇرعىن ءۇي قۇرىلىسىن كوزدەمەيتىن ۋچاسكەلەردە جەكە تۇرعىن ۇيلەر سالىنعان جاعدايلار تىركەلىپ وتىرعان الماتى ءۇشىن ماڭىزدى.
«جەر ۋچاسكەسىنىڭ بولۋى ونىڭ ۇستىنە كەز كەلگەن پارامەترمەن جانە ماقساتپەن نىسان سالۋعا قۇقىق بەرمەيدى. قۇرىلىس جەر ۋچاسكەسىنىڭ ماقساتتى ساناتىنا، قالا قۇرىلىسى رەگلامەنتتەرىنە جانە زاڭناما تالاپتارىنا ساي بولۋى ءتيىس»، — دەپ اتاپ ءوتتى قۇرىلىس باقىلاۋ باسقارماسىنىڭ باسشىسى ولجاس تولەبايەۆ.