وقيعا الماتى حالىقارالىق اۋەجايىندا بولدى: زەينەتكەر جاستاعى جولاۋشى FlyArystan اۋەكومپانياسىنىڭ رەيسىنەن سومكەسىندە جارىلعىش زات بار دەپ ازىلدەگەننەن كەيىن ءتۇسىرىلدى. وسىعان بايلانىستى اقتاۋعا بەت العان ۇشاقتىڭ ۇشۋى ەكى ساعاتقا كەشىكتىرىلدى، دەپ حابارلايدى infohub.kz سايتى.
Qumash Telegram-ارناسىندا ۆيدەو جاريالاعان جولاۋشىنىڭ ايتۋىنشا، بورتسەرىك سومكەنى جوعارعى سورەگە كوتەرە الماعان، سوندا قارت جولاۋشىلاردىڭ ءبىرى وعان كومەكتەسپەك بولعان. ول باگاجدىڭ اۋىرلىعى تۋرالى ازىلدەپ، سومكەدە جارىلعىش زات بولۋى مۇمكىن ەكەنىن ايتقان.
كولىك پوليسياسى دەپارتامەنتى وقيعانىڭ 3 قىركۇيەكتە بولعانىن راستادى. رەسمي مالىمەتكە سايكەس، جولاۋشى قازاق تىلىندە «مىنا سومكەدە قورعاسىن با، بومبا ما؟» دەگەن سوزىنەن كەيىن رەيستەن تۇسىرىلگەن.
كولىك پوليسەيلەرى اۆياسيالىق قاۋىپسىزدىك قىزمەتكەرلەرىمەن بىرلەسىپ جەدەل تەكسەرۋ جۇرگىزدى، ناتيجەسىندە تىيىم سالىنعان زاتتار مەن جارىلعىش زاتتار تابىلمادى. ەۆاكۋاسيا جاسالمادى، اۋەجاي ادەتتەگى رەجيمدە جۇمىسىن جالعاستىردى.
قۇقىق بۇزۋشىعا قاتىستى ۇساق بۇزاقىلىق تۋرالى ماتەريال جاسالىپ، شەشىم قابىلداۋ ءۇشىن سوتقا جىبەرىلەدى. پوليسيا ازاماتتاردى مۇنداي ازىلدەردەن اۋلاق بولۋعا شاقىرىپ، ولار قىلمىستىق جاۋاپكەرشىلىككە جانە بۇزۋشىنىڭ وزىنە دە، اينالاسىنداعىلارعا دا تەرىس سالدارعا اكەلۋى مۇمكىن ەكەنىن اتاپ ءوتتى.