الماتىدا ۇلكەن الماتى وزەنىنىڭ جاعالاۋىنداعى رەكونسترۋكسيا جالعاسۋدا، ەندى ونىڭ ءبىر بولىگى جاياۋ جۇرگىنشىلەرگە ۋاقىتشا جابىلادى. جۇمىس بارىسىنا قاراي شەكتەۋلەر كەزەڭ-كەزەڭىمەن ەنگىزىلەدى، دەپ حابارلايدى infohub.kz سايتى.
Almaty Joly مالىمەتىنشە، الدىمەن №1 تۇندىرعىشتان (دامبادان) ءال-فارابي داڭعىلىنا دەيىنگى شىعىس جاعى جابىلادى. ءدال وسى جەردە شاعىن ءجۇزۋ الابى جانە سپورت الاڭدارىنىڭ كوپشىلىگى ورنالاسقان. كەيىن شەكتەۋلەر جاعالاۋدىڭ قالعان بولىكتەرىنە، اباي داڭعىلىنا دەيىن بىرتىندەپ تارالادى.
جوندەۋ بارىسىندا سۋارۋ جۇيەسىن قالپىنا كەلتىرۋ، تروتۋارلاردى جاڭارتۋ، بورديۋرلەردى ءىشىنارا اۋىستىرۋ، بۇتالار مەن كوگالداردى كوشىرۋ، سونداي-اق اعاشتاردى سانيتارلىق كەسۋ جوسپارلانۋدا.
«قالا تۇرعىندارى مەن قوناقتارىن ۋاقىتشا شەكتەۋلەردى ەسكەرۋگە، ۋاقىتشا جول بەلگىلەرىنىڭ تالاپتارىن ساقتاۋعا جانە باعىتتى الدىن الا جوسپارلاۋدى سۇرايمىز»، — دەلىنگەن Almaty Joly حابارلاماسىندا.
№1 تۇندىرعىشتان (دامبادان) ءال-فارابي داڭعىلىنا دەيىنگى شىعىس جاعىمەن ءوتۋ 20 كۇنگە شەكتەلەدى.
ەسكە سالايىق، ۇلكەن الماتى جاعالاۋىنداعى رەكونسترۋكسيانى 2024 جىلدىڭ قازان ايىنان باستاپ «پاۆلودار وزەن پورتى» اق جۇرگىزىپ جاتىر. وسى ۋاقىت ىشىندە جوبا قالا تۇرعىندارى تاراپىنان دا، قالا اكىمدىگى تاراپىنان دا بىرنەشە رەت سىنعا ۇشىرادى. باستاپقىدا نىساننىڭ پاسپورتىنا سايكەس رەكونسترۋكسيانى 2025 جىلدىڭ جەلتوقسانىندا اياقتاۋ جوسپارلانعان بولاتىن، الايدا كەيىن مەرزىم 2026 جىلدىڭ مامىر ايىنىڭ سوڭىنا اۋىستىرىلدى. جاڭا شەكتەۋلەر جۇمىستاردىڭ ءالى اياقتالماعانىن كورسەتەدى.
بۇعان دەيىن Kursiv LifeStyle جاعالاۋداعى رەكونسترۋكسيانىڭ الماتىلىق جاڭبىرعا توتەپ بەرە الماعانىن جازعان ەدى.