2026 جىلدىڭ باسىنان بەرى الماتىدا پوليسەيلەر 430-تان استام پاتەردە جاقىندىق قىزمەتى كورسەتىلگەنىن انىقتادى. رەيدتەر ناتيجەسىندە پاتەر يەلەرى اكىمشىلىك جاۋاپكەرشىلىككە تارتىلىپ، قىزمەت كورسەتۋشىلەر ەسەپكە الىندى، دەپ حابارلايدى infohub.kz.
كتك تەلەارناسىنىڭ مالىمەتىنشە، الماتىداعى جالدامالى پاتەرلەرگە رەيدتەر تۇراقتى تۇردە جۇرگىزىلەدى. پوليسەيلەر مەكەنجايلاردى قىزداردىڭ تەلەفون نومىرلەرى كورسەتىلگەن حابارلاندىرۋ سايتتارى ارقىلى تابادى. كوبىنەسە وسىنداي ۇيلەر تۋرالى كورشىلەر حابارلايدى.
«قىزمەتكەرلەر» «جۇمىستى» ينتەرنەتتەن تاپقانىن جانە بيزنەس ۇيىمداستىرۋشىلارىن ەشقاشان كورمەگەنىن ايتادى. قىزمەت قۇنىن جاسىرمايدى: ءبىر مەكەمەدە ورتاشا چەك 55 مىڭ تەڭگەدەن باستالىپ، ءتىپتى ءبولىپ تولەۋگە دە بولادى.
«ءبىز بۇل جۇمىستى تۇراقتى نەگىزدە جۇرگىزىپ كەلەمىز. جىل باسىنان بەرى وسىنداي 430-عا جۋىق ءۇي-جاي انىقتالدى، ولاردىڭ يەلەرى 450-باپ بويىنشا اكىمشىلىك جاۋاپكەرشىلىككە تارتىلىپ، 100 اەك (432 مىڭ تەڭگەدەن استام) كولەمىندە ايىپپۇل سالىندى»، — دەدى الماتى قالالىق پوليسيا دەپارتامەنتىنىڭ قوعامدىق قاۋىپسىزدىك باسقارماسىنىڭ باستىعى تيمۋر نوعايبايەۆ.
سونىمەن قاتار، وسىنداي مەكەمەلەردىڭ 750 قىزمەتكەرى ەسەپكە الىندى.