الماتىدا ەلەكتر قۋاتىن قارىز ءۇشىن ءوشىرۋ ءتاسىلىن وزگەرتۋ جوسپارلانۋدا: ەندى جارىقتى بۇكىل ۇيگە ەمەس، تەك قارىزكەرلەرگە عانا وشىرەدى. مۇنداي مەحانيزمدى «الاتاۋ جارىق كومپانياسى» اق ۇسىنىپ وتىر. بۇل تۋرالى infohub.kz سايتى حابارلايدى.
بۇعان دەيىن كوپقاباتتى ءۇي تۇرعىندارى الەۋمەتتىك جەلىلەردە تۇرعىن ءۇي كووپەراتيۆتەرىنىڭ كوپ ميلليوندىق قارىزدارى سالدارىنان جارىقتىڭ جاپپاي وشىرىلۋىنە شاعىمدانعان. ولار بارلىق مەنشىك يەلەرىنىڭ ەمەس، تەك تولەمەگەندەردىڭ عانا ەلەكتر قۋاتىنان ايىرىلۋى كەرەك ەكەنىن ايتىپ، نارازىلىق بىلدىرگەن. كومپانيادا جەكەلەگەن پاتەرلەردى ءوشىرۋ مۇمكىن ەمەستىگىن، سەبەبى ەلەكترمەن جابدىقتاۋ شارتى باسقارۋشى ۇيىممەن (وسي، كسك نەمەسە باسقارۋشى كومپانيا) جاسالعانىن، ول ءبىرىڭعاي تۇتىنۋشى بولىپ تابىلاتىنىن ءتۇسىندىردى. «ءۇي ىشىندەگى ەلەكتر جەلىلەرى مەن ەسەپتەۋ قۇرىلعىلارى باسقارۋشى ۇيىمنىڭ بالانسىندا جانە پايدالانۋ ايماعىندا بولعاندىقتان، “الاتاۋ جارىق كومپانياسى” اق — “ەنەرگوسبىت” فيليالىنىڭ تۇرعىن ءۇي كەشەنى ىشىندە جەكەلەگەن تۇتىنۋشىلاردى ىرىكتەپ شەكتەۋگە تەحنيكالىق مۇمكىندىگى مەن زاڭدى نەگىزى جوق»، — دەپ اتاپ ءوتتى كومپانيادا.
ەندى ۇلگىلىك شارتقا قوسىمشا كەلىسىمدەر جاساسۋ ۇسىنىلادى، وندا ەلەكتر جەلىلەرىن بەرۋ مەرزىمى بەلگىلەنەدى. «قوسىمشا كەلىسىم جاساسۋ تۇرمىستىق تۇتىنۋشىلارعا جەكە شوتتار اشۋعا، تۇتىنىلعان ەلەكتر ەنەرگياسى ءۇشىن تىكەلەي ەسەپ ايىرىسۋلاردى ۇيىمداستىرۋعا جانە قارىز بولعان جاعدايدا ەلەكترمەن جابدىقتاۋدى مەكەن-جايلىق شەكتەۋدى قولدانۋعا مۇمكىندىك بەرەدى — ياعني تەك قارىزكەرلەرگە قاتىستى، قالعان تۇرعىندارعا اسەر ەتپەي»، — دەپ ءتۇسىندىردى «الاتاۋ جارىق كومپانياسىندا».
الايدا بۇل تەتىك ءۇي ورتاق قاجەتتىلىكتەرىنە جۇمسالاتىن ەلەكتر ەنەرگياسى — كىرەبەرىستەردى، اۋلالاردى جارىقتاندىرۋ، ليفتىلەردىڭ جۇمىسى ءۇشىن تولەم جاسالماعان جاعدايدا ىستەمەيدى. وندا ءوشىرۋ باس كوممەرسيالىق ەسەپتەۋ قۇرىلعىسىنان جۇرگىزىلەدى، ال دالمە-دال ءوشىرۋ تەحنيكالىق مۇمكىن ەمەس. «تەڭگەرىم ۇستاۋشىلار مەن قىزمەت كورسەتۋشى ۇيىمدار ءۇي ىشىندەگى ەلەكتر جەلىلەرىن تەحنيكالىق پايدالانۋعا، كوممەرسيالىق ەسەپتەۋ قۇرالدارىنىڭ كورسەتكىشتەرىن ۋاقتىلى بەرۋگە، جالپى ءۇي مەن جەكە ەسەپتەۋ قۇرالدارىنىڭ كورسەتكىشتەرى اراسىنداعى ايىرمانى وتەۋگە، سونداي-اق ءۇي ورتاق قاجەتتىلىكتەرىنە تۇتىنىلاتىن ەلەكتر ەنەرگياسىن تولەۋگە جاۋاپتى بولىپ قالا بەرەدى»، — دەپ قوستى كومپانيادا. وندا وسي، كسك جانە باسقارۋشى كومپانيالار قاجەتتى شارتتاردى ۋاقتىلى رەسىمدەۋى كەرەك ەكەنىن ەسكە سالدى.