15 شىلدەدە الماتىنىڭ بىرنەشە اۋدانىندا جاپپاي ەلەكتر جارىعى ءسوندى. «الاتاۋ جارىق كومپانياسى» اق مالىمەتىنشە، سەبەبى – ەلەكتر جەلىلەرىندەگى تەحنولوگيالىق اقاۋلار. بۇل تۋرالى 24.kz حابارلايدى.
كومپانيانىڭ ءباسپاسوز قىزمەتىنىڭ تۇسىندىرۋىنشە، 15 شىلدەدە قالانىڭ ءارتۇرلى اۋداندارىندا تەحنولوگيالىق اقاۋلار ورىن الىپ، سالدارىنان تۇتىنۋشىلاردىڭ ءبىر بولىگىنە ەلەكتر قۋاتى ۋاقىتشا شەكتەلگەن. «تەحنولوگيالىق اقاۋلاردىڭ سەبەپتەرى انىقتالۋدا. وقيعا ورنىندا «الاتاۋ جارىق كومپانياسى» اق-نىڭ جەدەل جوندەۋ بريگادالارى جۇمىس ىستەۋدە. ماماندار بولعان وقيعانىڭ سەبەبىن انىقتاۋ جانە تۇتىنۋشىلاردىڭ ەلەكترمەن جابدىقتالۋىن مۇمكىندىگىنشە تەز قالپىنا كەلتىرۋ ءۇشىن قاجەتتى شارالاردى قابىلداۋدا»، – دەلىنگەن ءباسپاسوز قىزمەتىنىڭ حابارلاماسىندا.
كومپانيانىڭ دەرەگىنشە، ساعات 15:50-دە رىسقۇلوۆ داڭعىلى، جانگەلدين، باياناۋىل جانە شەمياكين كوشەلەرىنىڭ ارالىعىنداعى تۇتىنۋشىلار ۋاقىتشا جارىقسىز قالعان. ساعات 15:55-تە سەرىكوۆ، وماروۆ، جانسۇگىروۆ جانە ارتيللەريسكايا كوشەلەرىنىڭ ارالىعىنداعى تۇتىنۋشىلاردا ەلەكتر قۋاتى وشكەن. ساعات 16:45-تە پوچتوۆايا، بوندارەنكو، مۋسورگسكي جانە گريبوەدوۆ كوشەلەرىنىڭ ارالىعىنداعى تۇتىنۋشىلار شەكتەلسە، ساعات 16:55-تە اباي داڭعىلى، ماسانچي، جامبىل جانە ءادى ءشارىپوۆ كوشەلەرىنىڭ ارالىعىنداعى تۇتىنۋشىلار جارىقسىز قالعان.
ەسكە سالا كەتەيىك، بۇعان دەيىن «الاتاۋ جارىق كومپانياسى» اق-نىڭ اۆاريالىق جاعدايلار كارتاسىندا الماتىنىڭ بىرنەشە اۋدانىندا ەلەكتر قۋاتىنىڭ وشىرىلگەنى كورسەتىلگەن ەدى. كەيىن بوستاندىق اۋدانىنداعى اسقار تاۋ جانە ەرمەنساي شاعىن اۋداندارىندا ەلەكترمەن جابدىقتاۋ قالپىنا كەلتىرىلدى. ونداعى ۋاقىتشا ەلەكتر قۋاتىنىڭ وشۋىنە ابونەنتتىك ترانسفورماتورلىق قوسالقى ستانسيالارداعى تەحنولوگيالىق اقاۋ سەبەپ بولعان.