الماتىنىڭ اۋەزوۆ اۋدانىندا قالا كۇنىنە وراي اۋدانى 400 شارشى مەتر جاڭا جاستار كوميۋنيتي-ورتالىعى اشىلدى. مۇندا دىبىس جازۋ ستۋدياسى، بي زالى، روبوتوتەحنيكا مەن 3D-مودەلدەۋ ايماقتارى، سيفرلىق كونتەنت جاساۋ كەڭىستىگى، سونداي-اق ءبىلىم بەرۋ جانە كەڭەس بەرۋ الاڭدارى جابدىقتالعان. ورتالىقتىڭ بارلىق مۇمكىندىگى جاستارعا تەگىن قولجەتىمدى، دەپ حابارلايدى infohub.kz سايتى.
جاڭا كەڭىستىكپەن الماتى اكىمىنىڭ ورىنباسارى ابزال نۇكەنوۆ تانىستى. نىساننىڭ اشىلۋى الماتى اكىمى دارحان ساتىبالدىنىڭ قولداۋىمەن جاستار ورتالىقتارى جەلىسىنىڭ دامۋىن جالعاستىردى. قازىرگى تاڭدا قالانىڭ بارلىق اۋدانىندا وسىنداي 12 الاڭ جۇمىس ىستەپ تۇر.
«جاستار ورتالىعى تەك ءىس-شارا وتەتىن ورىن ەمەس، جاس ادام ءبىلىم الىپ، دامىپ، ءوز يدەياسىن جۇزەگە اسىرا الاتىن كەڭىستىك بولۋى ماڭىزدى»، — دەدى ابزال نۇكەنوۆ.
جاڭا ورتالىقتىڭ ءبىر باعىتى — «AI كرەاتور» كۋرسى. مۇندا جاستارعا كونتەنت جاساۋدا جاساندى ينتەللەكتىنى پايدالانۋدى ۇيرەتەدى: يدەيا مەن سەناريدەن باستاپ ۆيزۋال، دىبىس جانە مونتاجعا دەيىن. ءبىرىنشى لەگىنە 20-عا جۋىق ادام تىركەلدى.
دىبىس جازۋ ستۋدياسىندا ءان مەن پودكاست جازۋعا، بي زالىندا ۆوركشوپ وتكىزۋگە، كونتەنت ايماعىندا فوتو مەن ۆيدەو تۇسىرۋگە بولادى. روبوتوتەحنيكا مەن 3D-مودەلدەۋ ايماعىندا اشىلۋعا وراي الماتىنىڭ سيمۆولدارىنىڭ ءبىرى — الماسى بار «تىلەك اعاشى» جاسالدى.
اشىلۋ كۇنى ALMATY 24 sagat بەينەبايقاۋى دا باستالدى. 24 ساعات ىشىندە قاتىسۋشىلار قالا، ءوز اۋدانى، سۇيىكتى جەرلەرى مەن ادامدارى تۋرالى قىسقا بەينە ءتۇسىرۋى كەرەك.
«ءاربىر جاس ادامنىڭ ءوز باعىتىن تابۋىنا — جاڭا داعدى يگەرۋىنە، تەحنولوگيادا، شىعارماشىلىقتا ءوزىن سىناپ كورۋىنە نەمەسە جەكە جوباسىن باستاۋىنا مۇمكىندىك بولعانىن قالايمىز»، — دەپ ءتۇسىندىردى الماتى جاستار ساياساتى باسقارماسىنىڭ باسشىسى ازيز كاجدەنبەك.
جىل باسىنان بەرى 10،6 مىڭنان استام جاس الماتىلىق كوميۋنيتي-ورتالىقتاردان جۇمىسقا ورنالاسۋ مەن كاسىپتىك باعدار بويىنشا كومەك، سونداي-اق پسيحولوگيالىق جانە قۇقىقتىق كەڭەس الدى. «زاڭ جانە ءتارتىپ» باعىتى اياسىندا مۇندا 18 مىڭنان استام ادام قاتىسقان 190-عا جۋىق ءىس-شارا ءوتتى، ال «تازا قازاقستان» اياسىنداعى 80-نەن استام ەكولوگيالىق اكسيا 10 مىڭنان استام جاس قالا تۇرعىنىن بىرىكتىردى.