الماتىدا جولاۋشىلار اۆتوبۋسى مەن ەكى جۇك كولىگى — زيل جانە گاز قاتىسقان اۋىر جول-كولىك وقيعاسى بولدى. اپات سالدارىنان ءتورت ادام دارىگەرگە قارالدى، دەپ حابارلايدى infohub.kz سايتى.
NUR.KZ تىلشىسىنە الماتى قالالىق پوليسيا دەپارتامەنتىنىڭ ءباسپاسوز قىزمەتى حابارلاعانداي، وقيعا قالانىڭ جەتىسۋ اۋدانىندا تىركەلدى.
«الدىن الا دەرەكتەر بويىنشا، Golden Dragon ماركالى اۆتوبۋستىڭ جۇرگىزۋشىسى بوكەيحانوۆا كوشەسىمەن سولتۇستىككە قاراي كەلە جاتىپ، رايىمبەك داڭعىلىنا جاقىنداعاندا رۋلگە يە بولا الماي، جول جيەگىندە تۇرعان زيل ماركالى جۇك كولىگىمەن سوقتىعىستى»، — دەلىنگەن حابارلامادا.
سوققىدان زيل ينەرسيامەن الدا كەلە جاتقان گاز ماركالى كولىككە سوعىلدى. جكو سالدارىنان ءتورت ادام، ونىڭ ىشىندە زيل جۇرگىزۋشىسى مەن اۆتوبۋس جولاۋشىلارى مەديسينالىق كومەككە جۇگىندى.
الماتى تۇرعىنى انگەلينا ستەپانوۆا Threads الەۋمەتتىك جەلىسىندە اۆتوبۋسپەن بولعان وقيعا تۋرالى جازبا جاريالادى.
«بۇگىن ۇلىممەن بوكەيحانوۆا — رايىمبەك بويىندا جكو-عا تاپ بولدىق. كىمنىڭ كىنالى ەكەنىن بىلمەيمىن. اۆتوبۋس بۇرىلىسقا سىيماي كەتكەن سياقتى. قاتتى سوققى، شۋ، وتە قورقىنىشتى. قورىقتىق، مىنا قىزدىڭ جاعدايى جاقسى بولسىن دەپ ۇمىتتەنەمىن. ول جەدەل جاردەم كولىگىمەن كەتتى»، — دەلىنگەن جازبادا.
جاريالانعان بەينەجازبادا اپاتتىڭ سالدارى كورسەتىلگەن. اۆتوردىڭ ايتۋىنشا، سالونعا سىنعان اينەكتەر ۇشقان. ول ءوزى مەن ۇلىنىڭ اۆتوبۋستىڭ الدىڭعى بولىگىندە بولعانىن، ال ەكى بالاسىمەن بىرگە بولعان جۇكتى قىزدىڭ زارداپ شەككەنىن ايتتى.
جكو فاكتىسى بويىنشا تەكسەرۋ جۇرگىزىلۋدە. اپاتتىڭ ءمان-جايى مەن سەبەپتەرى انىقتالۋدا.