الماتىدا وقۋ جىلىنىڭ باسىنا قاراي 15 ماگيسترالدىق كوشەدە ورتاشا جوندەۋ جۇمىستارى اياقتالدى، سونداي-اق قالعان نىساندارداعى جۇمىستاردى اياقتاۋ مەرزىمدەرى بەلگىلەندى، دەپ حابارلايدى infohub.kz سايتى.
بيىل وڭتۇستىك استانادا جالپى ۇزىندىعى 250 شاقىرىمدى قۇرايتىن 340 كوشەنى ورتاشا جوندەۋمەن قامتۋ جوسپارلانۋدا. قالالىق اكىمدىكتە اتاپ وتكەندەي، بۇل جاقسى جانە قاناعاتتانارلىق جاعدايداعى جولداردىڭ ۇلەسىن 95 پايىزعا جەتكىزۋگە مۇمكىندىك بەرەدى.
جول ينفراقۇرىلىمىن دامىتۋ باسقارماسىنىڭ مالىمەتىنشە، 1 قىركۇيەككە قاراي ۇزىندىعى 32 شاقىرىمدى قۇرايتىن 15 ماگيسترالدىق كوشەنىڭ ۋچاسكەلەرىندە جوندەۋ جۇمىستارى اياقتالدى. ولاردىڭ قاتارىندا زەنكوۆ، جاماقايەۆ، جەتىسۋ، شەمياكين، مامبەتوۆ، رىسقۇلبەكوۆ، جانقوجا باتىر، يسكەندىروۆ، اقان سەرى، ماناس، عابدۋللين، جاندوسوۆ، ورتالىق، ۇشقەمپىروۆ كوشەلەرى جانە قۇلجا تراكتىسى بار.
سونىمەن قاتار، جۇبانوۆ، وتەگەن باتىر كوشەلەرىنىڭ ۋچاسكەلەرىندە، سونداي-اق التىنسارين جانە اباي داڭعىلدارىندا اسفالتبەتون جابىنىنىڭ تومەنگى قاباتى توسەلگەن. الداعى دەمالىس كۇندەرى تىعىز قيىرشىقتاس-ماستيكالىق اسفالتبەتون قوسپاسىنان جوعارعى قاباتتى توسەۋ جوسپارلانۋدا، ودان كەيىن جول بەلگىلەرى سىزىلادى. اكىمدىكتە ورتاشا جوندەۋ اياسىندا ءجۇرىس بولىگىنىڭ بارلىق ەنى بويىنشا جابىن جاڭارتىلىپ، تروتۋارلار مەن ارىق ناۋالارىنىڭ زاقىمدالعان ۋچاسكەلەرى دە جوندەلەتىنىن اتاپ ءوتتى.
اۋداندىق ماڭىزى بار كوشەلەرگە ەرەكشە نازار اۋدارىلۋدا. الاتاۋ اۋدانىندا بيىل 99 كوشە، اۋەزوۆ اۋدانىندا – 16، ناۋرىزباي اۋدانىندا – 19، بوستاندىق اۋدانىندا – 39، تۇركسىب اۋدانىندا – 21، جەتىسۋ اۋدانىندا – 44، مەدەۋ اۋدانىندا – 78، المالى اۋدانىندا – 1 كوشە ورتاشا جوندەۋمەن قامتىلادى. قازىرگى ۋاقىتتا جۇمىستار 70 پايىزعا اياقتالعان، تولىق اياقتاۋ 31 قازانعا دەيىن جوسپارلانعان.
سونىمەن قاتار، باسقارما تاراپىنان اقجار، بورالداي جانە راحات-مادەنيەت شاعىن اۋداندارىندا جالپى ۇزىندىعى 96 شاقىرىمدى قۇرايتىن جاڭا جولداردىڭ قۇرىلىسى جالعاسۋدا، ونىڭ 80 پايىزدان استامى دايىن.