19 جاستاعى الماتى تۇرعىنى بەينەگە ءتۇسىرىلىپ، الەۋمەتتىك جەلىلەردە جاريالانعان ءتارتىپسىز جۇرگىزۋى ءۇشىن بەس تاۋلىككە قاماۋعا الىندى، دەپ حابارلايدى infohub.kz.
الماتى قالاسى پوليسيا دەپارتامەنتىنىڭ قىزمەتكەرلەرى ينتەرنەت كەڭىستىگىن باقىلاۋ بارىسىندا Mercedes اۆتوكولىگىنىڭ جۇرگىزۋشىسى جول قوزعالىسى ەرەجەلەرىن اشىق تۇردە بۇزعان بەينەجازبانى انىقتادى. بۇزۋشىنىڭ جەكە باسى انىقتالىپ، ول 19 جاستاعى قالا تۇرعىنى بولىپ شىقتى.
پوليسيانىڭ ايتۋىنشا، «جاس جىگىتتىڭ كولىك جۇرگىزۋ قۇقىعى جوق ەكەنى انىقتالدى. وسى بۇزۋشىلىعى ءۇشىن ول اكىمشىلىك جاۋاپكەرشىلىككە تارتىلدى. سونىمەن قاتار، اشىق تۇردەگى ءتارتىپسىز مىنەز-ق ۇلىق پەن قوعامدىق ءتارتىپتى بۇزعانى ءۇشىن جۇرگىزۋشى پوليسياعا جەتكىزىلىپ، الماتى قالاسىنىڭ مامانداندىرىلعان اۋدانارالىق اكىمشىلىك قۇقىق بۇزۋشىلىقتار جونىندەگى سوتىنىڭ شەشىمىمەن ۇساق بۇزاقىلىق ءۇشىن جاۋاپكەرشىلىككە تارتىلدى. سوت وعان بەس تاۋلىك مەرزىمگە اكىمشىلىك قاماققا الۋ جازاسىن تاعايىندادى».
الماتى قالاسى پوليسيا دەپارتامەنتى كەز كەلگەن زاڭسىز مازمۇن الەۋمەتتىك جەلىلەردە جاريالانسا، ول تەكسەرۋ نىساناسىنا اينالاتىنىن جانە ونىڭ اۆتورلارى ءسوزسىز زاڭ بويىنشا جاۋاپكەرشىلىككە تارتىلاتىنىن ەسكە سالادى.