الەۋمەتتىك جەلىلەردە اسكەري قىزمەتكە شاقىرۋ تۋرالى اقپارات تاراتقان الماتى تۇرعىنى اكىمشىلىك جاۋاپكەرشىلىككە تارتىلدى، دەپ حابارلايدى infohub.kz.
قورعانىس مينيسترلىگىنىڭ ءباسپاسوز قىزمەتىنەن ءمالىم ەتكەندەي، 17 شىلدەدە الماتىلىق Facebook-تە ازاماتتاردىڭ اۋرۋى بولسا دا اسكەرگە شاقىرىلۋى مۇمكىن دەگەن بەينەروليك جاريالاعان.
وسى فاكتى بويىنشا قۇزىرلى ورگاندارمەن بىرلەسىپ تەكسەرۋ جۇرگىزىلدى. ناتيجەسىندە تاراتىلعان اقپاراتتىڭ شىندىققا سايكەس كەلمەيتىنى انىقتالدى. 15 تامىزدا اۆتور قازاقستان رەسپۋبليكاسىنىڭ زاڭناماسىنا سايكەس اكىمشىلىك جاۋاپكەرشىلىككە تارتىلدى.
ۆەدومستۆو ازاماتتىڭ اسكەري قىزمەتكە جارامدىلىعى تۋرالى شەشىم مەديسينالىق كۋالاندىرۋ ناتيجەلەرى بويىنشا، دەنساۋلىق جاعدايى مەن بەلگىلەنگەن تالاپتاردى ەسكەرە وتىرىپ قابىلداناتىنىن ەسكە سالدى.
وسىلايشا، دەنساۋلىق جاعدايىن ەسەپكە الماي اسكەرگە شاقىرۋ مۇمكىن دەگەن مالىمدەمەلەر بەلگىلەنگەن تارتىپكە سايكەس كەلمەيدى. زاڭنامادا كوزدەلگەن جاعدايلاردا جالعان اقپارات تاراتۋ جاۋاپكەرشىلىككە اكەلۋى مۇمكىن. اسكەرگە شاقىرۋ، مەديسينالىق كۋالاندىرۋ ءتارتىبى جانە اسكەري قىزمەتتىڭ باسقا دا ماسەلەلەرى تۋرالى اقپاراتتى تەك رەسمي كوزدەردەن الۋدى ۇسىنامىز. اقپاراتتى تەكسەرىپ، راستالماعان دەرەكتەردى تاراتپاڭىز، — دەپ قوستى مينيسترلىك.