وسكەمەندە 35 جاستاعى الماتى تۇرعىنى اۋە رەيسىنەن ءتۇسىرىلدى، ول ۇشاق بورتىندا ءتارتىپ بۇزعان، دەپ حابارلايدى infohub.kz سايتى.
وقيعا 24 تامىزدا بولدى. كولىك پوليسەيلەرى وسكەمەن حالىقارالىق اۋەجايىندا الماتىدان كەلگەن رەيستەگى ەر ادامدى اۋە كەمەسى كومانديرىنىڭ اكتىسى نەگىزىندە ۇشاقتان ءتۇسىردى.
انىقتالعانداي، الماتى اۋەجايىنان ۇشىپ شىعۋ كەزىندە، بيىكتىك جيناۋ كەزىندە جولاۋشى قاۋىپسىزدىك بەلدىگىن تاقپاعان جانە بورتتا ىشكەن تاماق پەن سۋسىنداردىڭ، ونىڭ ىشىندە الكوگولدىك ىشىمدىكتەردىڭ قالدىقتارىن كورنەكى تۇردە شاشىپ تاستاعان.
ەر ادام ەكيپاج مۇشەلەرىنىڭ تالاپتارىن ورىنداماعان، اۆياكومپانيا قىزمەتكەرلەرى مەن باسقا جولاۋشىلارعا باعىتتالعان ادەپسىز سوزدەر ايتقان. زاڭسىز ارەكەتتەرىن جالعاستىرا وتىرىپ، ول ءوز ورنىنان ءوز بەتىنشە تۇرىپ، ۇشاقتىڭ ارتقى بولىگىنە بارىپ، بوس جولاۋشى ورىندىقتارىن يەلەنگەن. تەكسەرۋ بارىسىندا بۇل ازاماتتىڭ بۇرىن دا بىرنەشە رەت جاۋاپكەرشىلىككە تارتىلعانى انىقتالدى.
وسكەمەننىڭ مامانداندىرىلعان اكىمشىلىك قۇقىق بۇزۋشىلىق جونىندەگى سوتى ەر ادامدى ۇساق بۇزاقىلىق جانە قوعامدىق ورىنداردى لاستاعانى ءۇشىن كىنالى دەپ تانىپ، وعان 20 ساعات مىندەتتى قوعامدىق جۇمىس جازاسىن تاعايىندادى.
جىل باسىنان بەرى كولىك پوليسياسى دەپارتامەنتىنىڭ قىزمەتكەرلەرى ۇشاق بورتىنداعى ءارتۇرلى قۇقىق بۇزۋشىلىقتار ءۇشىن 231 ادامدى جاۋاپكەرشىلىككە تارتتى.