الماتىلىق «تۋر ينۆەست» كومپانياسى يراندىق Mahan Air اۋەكومپانياسىمەن ىنتىماقتاستىعى ءۇشىن اقش-تىڭ قايتالاما سانكسياسىنا ىلىگۋ ءقاۋپى بار، دەپ حابارلايدى infohub.kz سايتى.
اقش قارجى مينيسترلىگىنىڭ شەتەلدىك اكتيۆتەردى باقىلاۋ باسقارماسى (OFAC) قازاقستاندىق زاڭدى تۇلعانى ءوز تىزىلىمىنە ەنگىزدى. امەريكاندىق ۆەدومستۆو قۇجاتتارىنا سايكەس، «تۋر ينۆەست» ءۇشىن Secondary sanctions risk بەلگىسى قويىلعان، بۇل شەكتەۋلەرگە تىكەلەي ءىلىنۋ ەمەس، ولاردىڭ استىنا ءتۇسۋ ءقاۋپىن بىلدىرەدى. قولدانىستاعى شەكتەۋلەر ءۇشىن رەتتەۋشى Subject to Secondary Sanctions دەگەن تۇجىرىمدى پايدالانادى.
«تۋر ينۆەست» كومپانياسى نارىقتا 2014 جىلدان بەرى جۇمىس ىستەيدى جانە شاعىن كاسىپكەرلىك مارتەبەسىنە يە. شتاتىندا بەس ادامنان از قىزمەتكەر بار، ال تولەنگەن سالىق سوماسى 18،2 ملن تەڭگەنى قۇرادى. تىركەۋ قۇجاتتارىندا جالعىز قىزمەت ءتۇرى — تۋروپەراتور رەتىندە جۇمىس ىستەۋ كورسەتىلگەن، دەلىنگەن Adata دەرەكتەرىندە.
كاسىپورىن ەكى قۇرىلتايشىعا تيەسىلى: انسار دۇيسەنعالييەۆ — ول سونداي-اق «جەتىسۋ قوناق ءۇيى» جانە Crystal Bay Kazakhstan كومپانياسىن باسقارادى (ەكى كاسىپورىن دا ارەكەتسىز دەپ بەلگىلەنگەن)، جانە زياي باباكا الي — «تۋر ينۆەست» تەڭ قۇرىلتايشىسى ءارى ديرەكتورى، سونىمەن قاتار قازاقستانداعى «يران بيزنەس ورتالىعىن» باسقارادى.
OFAC جاڭارتىلعان تىزىمىنە قازاقستان، مالايزيا، تۇركيا، ءباا جانە ۇلىبريتانيانىڭ زاڭدى تۇلعالارى ەندى. ولاردىڭ بارلىعى يراندىق Mahan Air اۋە تاسىمالداۋشىسىمەن بايلانىسى ءۇشىن امەريكاندىق رەتتەۋشىنىڭ نازارىنا ىلىكتى، بۇل اۋەكومپانيا بۇرىن الماتىعا تىكەلەي رەيستەر ورىنداعان (ءقازىر ۇشۋلار توقتاتىلعان).
اقش بيلىگىنىڭ تالاپتارى ازاماتتىق جولاۋشىلار تاسىمالىن ۇيىمداستىرۋعا قاتىستى ەمەس. OFAC اقپاراتى بويىنشا، تەگەران شەتەلدىك دەلدالداردى جۇمىلدىرىپ، كولىك باعىتتارىن ۇزارتىپ، امەريكاندىق اۆياسيالىق بولشەكتەر مەن تەحنولوگيالاردى جاسىرىن ساتىپ الۋدا.
2026 جىلدىڭ ساۋىرىندە «كۋرسيۆ» ەۋروپالىق وداقتىڭ رەسەيگە كومەكتەسكەنى ءۇشىن قازاقستاندىق كومپانيا مەن بيزنەسمەندەرگە قارسى سانكسيا ەنگىزگەنىن حابارلاعان.