الماتىدا قاتتى ىستىقتا 16 ارنايى تەحنيكا جولداردى سۋارىپ جاتىر. قالا تۇرعىندارىنىڭ پىكىرى ەكىگە جارىلدى: بىرەۋلەر بۇل سۋ پروسەدۋرالارىنا قۋانسا، ەندى بىرەۋلەرى ونى پايداسىز، ءتىپتى زياندى دەپ سانايدى، دەپ حابارلايدى infohub.kz.
Threads الەۋمەتتىك جەلىسىندەگى پايدالانۋشىلار ەكى لاگەرگە ءبولىندى. بىرەۋلەر بالالىق شاعىن ەسكە الىپ، جولداعى سۋ اعىندارىنا قۋانسا، باسقالارى مۇنداي شارالاردىڭ پايداسى جوق، ءتىپتى زياندى ەكەنىن ايتادى. «اپتاپ ىستىقتا سۋارۋعا بولمايدى. ءبارى كۇيىپ كەتەدى. تامىزىقتار لينزا سياقتى اسەر ەتەدى»، «ءبىر مينۋتتان كەيىن ساۋناداعىداي»، «كەرىسىنشە، ودان ءارى تۇنشىعاسىڭ!» — دەپ جازادى الماتىلىقتار.
سونداي-اق، پىكىر بىلدىرۋشىلەردىڭ پايىمداۋىنشا، جول جيەگىندەگى اعاشتارعا بۇدان دا جامان بولۋى مۇمكىن، ويتكەنى سۋ بۋلانعان كەزدە اۋا تەمپەراتۋراسىن عانا كوتەرەدى. رەداكسيا الماتى باس بوتانيكالىق باعىنىڭ ماماندارىنا جۇگىندى. وندا ىستىقتا مول سۋارۋ اعاشتارعا زيان كەلتىرمەيتىنىن ءتۇسىندىردى. «كەرىسىنشە، سۋ بۋلانعاندا بەتكى قابات پەن جەرگە جاقىن اۋا قاباتىن ۋاقىتشا سالقىنداتادى، تەمپەراتۋرانى كوتەرمەيدى. ءبىراق وسىمدىكتەر ءۇشىن بۇل شارانىڭ تيىمدىلىگى تومەن. ىستىقتاعى باستى ماسەلە – تامىر ايماعىنداعى توپىراقتىڭ قىزىپ، قۇرعاپ كەتۋى»، — دەپ ءتۇسىندىردى بوتانيكا جانە فيتوينترودۋكسيا ينستيتۋتىنىڭ دەندرولوگيا زەرتحاناسىنىڭ مەڭگەرۋشىسى اينۋر ەسجانوۆا.
ال اكىمدىكتىڭ ءباسپاسوز قىزمەتىندە سۋارۋ قالا تۇرعىندارى ءۇشىن ەمەس، جول توسەمىنىڭ بالقىپ كەتپەۋى ءۇشىن جاسالاتىنىن اتاپ ءوتتى. بۇل سوزدەردى Techinsider باسىلىمى دا راستايدى: ىستىقتا اسفالتتىڭ قۇرامىنداعى بيتۋم بالقيدى. ال شىمكەنتتە ءورت سوندىرۋشىلەر جولداردى ەمەس، بالالاردى سۋارىپ جاتىر — ولار قۋانىشتى، ال ەرەسەكتەر ولاردىڭ قۋانىشىنان ءلاززات الادى.