الماتى وبلىسىندا التى جاسار بالانىڭ قان قۇيۋ كەزىندە س گەپاتيتىن جۇقتىرۋىنا بايلانىستى تەكسەرۋ ءجۇرىپ جاتىر، دەپ حابارلايدى infohub.kz سايتى.
اتا-اناسى بالانىڭ وبلىستىق بالالار كلينيكالىق اۋرۋحاناسىندا قان قۇيۋ كەزىندە جۇقتىرىلعان بولۋى مۇمكىن دەپ ەسەپتەيدى. اكەسى ءىستى باقىلاۋعا الۋدى ءوتىنىپ، پرەزيدەنت اكىمشىلىگىنە ءوتىنىش جولدادى.
اكەسىنىڭ ايتۋىنشا، اۋرۋحاناعا جات قىزىلۋدان بىرنەشە كۇن بۇرىن وتباسى تۇركيادا دەمالعان. وندا بالانىڭ قىزۋى كوتەرىلىپ، قاتتى جوتەل پايدا بولعان. قازاقستانعا ورالعاننان كەيىن بالادان قان كەتۋ باستالىپ، ونى شۇعىل تۇردە الماتى وبلىستىق بالالار كلينيكالىق اۋرۋحاناسىنا جەتكىزگەن. دارىگەرلەر يممۋندى ترومبوسيتوپەنيا – يممۋندىق جۇيەنىڭ ءوز ترومبوسيتتەرىن جويۋىنا اكەلەتىن اۋرۋدى انىقتاعان. اۋىر جاعدايعا بايلانىستى بالاعا قان قۇيۋ قاجەت بولعان.
كەيىن بالا پەدياتريا جانە بالالار حيرۋرگياسى عىلىمي ورتالىعىنا اۋىستىرىلىپ، وندا پتر-تەست ۆيرۋستىق س گەپاتيتىن انىقتاعان. اتا-اناسىنىڭ ايتۋىنشا، بۇعان دەيىن بالاعا مۇنداي دياگنوز قويىلماعان. اكەسى ينفەكسيا قان قۇيۋ كەزىندە جۇقتىرىلعان بولۋى مۇمكىن دەپ سانايدى. جەرگىلىكتى دەڭگەيدە ناتيجە بولماعان سوڭ، ول پرەزيدەنتكە جۇگىنگەن.
شاعىم تۇسكەننەن كەيىن الماتى وبلىستىق بالالار كلينيكالىق اۋرۋحاناسىندا تەكسەرۋ باستالدى. ول بالانىڭ قالاي جۇقتىرىلعانىن جانە بۇل كورسەتىلگەن مەديسينالىق كومەككە بايلانىستى ەكەنىن انىقتاۋى ءتيىس. رەسمي قورىتىندى ازىرگە جوق، جۇقتىرۋ سەبەپتەرى انىقتالمادى.